టిటిడిపికి 'పవన్ కళ్యాణ్' ఆక్సిజన్..?

Posted: 11/12/2015 12:56 PM IST

తెలుగు దేశం పార్టీ అధినేత చంద్రబాబు నాయుడుతో జనసేన అధినేత పవన్ కళ్యాణ్ భేటీ మీద తెలుగు రాష్ట్రాల్లో వేడిగా చర్చ జరుగుతోంది. పవన్ కళ్యాణ్ గతంలో చంద్రబాబు నాయుడుతో భేటీ చాలా హాట్ హాట్ గా సాగింది. అమరావతి నిర్మాణం కోసం అంటూ బలవంతంగా రైతుల నుండి భూములు లాక్కోవాలనుకుంటే చూస్తూ ఊరుకోనని హెచ్చరించారు. ఆ తర్వాత చాలా గ్యాప్ తర్వాత పవన్ కళ్యాణ్ చంద్రబాబు నాయుడుతో భేటీ అవుతున్నారు. అమరావతి శంకుస్థాపన కార్యక్రమం తర్వాత పవన్ భేటీ అవడం, అలాగే తెలుగు దేశం పార్టీ హైదరాబాద్ అధ్యక్షుడు మాగుంట గోపీనాథ్ కూడా ఈ భేటీకీ హాజరవుతుండటం సర్వత్రా చర్చకు దారి తీసింది.

Also Read: నయా ట్రెండ్: పంచెకట్టులో పవన్

ఏపి సిఎం నారా చంద్రబాబు నాయుడుకు మద్దతుగా జనసేన పార్టీ అధినేత పవన్ కళ్యాణ్ గత ఎన్నికల్లో ప్రచారం నిర్వహించారు. అలా పవన్ సపోర్ట్, ప్రజల బలంతో చంద్రబాబు నాయుడు తిరుగులేని మెజారిటీతో ఏపిలో అధికార పీఠం ఎక్కారు. అయితే తెలుగు రాష్ట్రాలు విడిపోయిన తర్వాత తెలంగాణలో తెలుగుదేశం పార్టీకి చాలా గడ్డు కాలం నడుస్తోంది. తెలంగాణ రాష్ట్రంలో తెలుగుదేశం పార్టీకి పూర్వ వైభవం తీసుకురావాలంటే పవన్ కళ్యాణ్ ఇమేజ్ ను వాడుకోవాలని చూస్తోందా అనే అనుమానాలకు తావిస్తోంది పరిస్థితి. తెలంగాణ రాష్ట్రంలో జనసేన పార్టీని గుర్తిస్తూ ఎన్నికల కమీషన్ గుర్తింపు జారీ చేసింది. అందుకే రానున్న జిహెచ్ఎంసీ ఎన్నికల్లో ఎన్డీయే కూటమితో పాటు బరిలోకి దిగాలని బిజెపి నాయకులు ఇప్పటికే పవన్ కు సూచించారు. మరి పవన్ ఇమేజ్ ను వాడుకొని గ్రేటర్ లో పాగా వెయ్యాలని తెలుగుదేశం చేస్తున్న ప్రయత్నాలు సరిగా సాగుతాయో లేదా అన్నదాని మీద క్లారిటీ రావాలంటే చంద్రబాబు, పవన్ భేటీ ముగియాలి.. అలాగే జిహెచ్ఎంసీ ఎన్నికల మీద ఇద్దరూ కలిసి ప్రకటన చెయ్యాలి.

*అభినవచారి*