ITEMVIDEOS: టెర్రరిస్ట్ మహ్మద్ రఫీక్ అరెస్ట్.. పేలుడు సామాగ్రి సొంతం

Posted: 01/30/2016 08:29 AM IST

బెంగళూరులో నేషనల్ ఇంటలిజెన్స్ ఏజెన్సీ అధికారులు అతి ప్రమాదకర ఉగ్రవాది మహ్మద్ రఫీక్ అలియాస్ ఆలమ్ జేబ్ ఆఫ్రీదీని అరెస్టు చేశారు. 2014 డిసెంబర్ 28వ తేదీ రాత్రి 8.30 గంటల సమయంలో బెంగళూరు చర్చిస్ట్రీట్‌లోని కోకోనట్ గ్రోవ్ బార్ అండ్ రెస్టారెంటు ఎదుట జరిగిన బాంబు పేలుడు కారణంగా ఒకరు మరణించారు. సిమి ఉగ్రవాది అయిన ఆలమ్ జేబ్ అఫ్రీదీ మరో కేసులో కూడా తప్పించుకుని తిరుగుతున్నాడు. కేరళలోని వాఘమాన్ ప్రాంతంలో సిమి శిక్షణా శిబిరాన్ని నిర్వహిస్తున్నట్లు ఇతడిపై గతంలో ఎన్ఐఏ కేసు నమోదు చేసింది.కాగా గతంలో తెలంగాణ పోలీసులతో కలిసి.. ఎన్ఐఏ అధికారులు మహ్మద్ రఫీక్ ను పట్టుకునేందుకు ప్రయత్నించినా కానీ అప్పుడు తప్పించుకున్నాడు.

కాగా రిపబ్లిక్ డే నాడు బాంబ్ పేలుళ్లకు రఫీక్ ప్లాన్ వేసినట్లు అధికారులు గుర్తించారు. ముఖ్యంగా ఇరానీయన్లను అతడు టార్గెట్ గా చేశాడని... అందుకే ఇరాన్ ఎంబసీ దగ్గర బాంబ్ బ్లాస్ట్ కు అంతా సిద్దం చేసుకున్నాడని సమాచారం. కాగా అతడి మీద గతంలోనే 3 లక్షల రివార్డు ఉంది. గత మూడేళ్లుగా బెంగళూరు శివారు ప్రాంతాల్లో నివసిస్తూ ఏసీ మెకానిక్‌గా పనిచేస్తున్నాడు. వాస్తవానికి బార్ లోపలే బాంబు పెడదామని భావించినా, సిబ్బంది అప్రమత్తంగా చూస్తూ ఉండటంతో బయట పెట్టినట్లు అతడు విచారణలో తెలిపాడు. బాంబులు తయారుచేయడం ఎలాగో తన హ్యాండ్లర్ నేర్పించగా, స్థానికంగానే దానికి కావల్సిన సామగ్రిని సేకరించానన్నాడు. 2008 నాటి అహ్మదాబాద్ పేలుళ్ల కేసులో కూడా ఇతడు నిందితుడు.