ITEMVIDEOS: చేతిలో చిన్నారి తలతో మహిళ

Posted: 03/01/2016 09:03 AM IST

మాస్కోలోని మెట్రో రైల్వేస్టేషన్ బయట బుర్ఖా ధరించిన ఓ మహిళ భయానక వాతావరణం సృష్టించింది. స్టేషన్ బయట అనుమానాస్పదంగా తిరుగుతున్న మహిళను అధికారులు గుర్తింపు పత్రాలు చూపించాలని కోరగా.. బ్యాగ్ నుంచి శిరచ్చేదం చేసిన నాలుగేండ్ల బాలిక తలను బయటకు తీసింది. శక్తిమంతమైన పేలుడు పదార్థాలతో స్టేషన్‌ను పేల్చివేస్తానని బెదిరింపులకు పాల్పడింది. దాంతో అప్రమత్తమైన భద్రతాసిబ్బంది మాస్కో మెట్రోను అర్ధాంతరంగా మూసివేశారు. ఆ తర్వాత సోదాలు నిర్వహించారు. ఆమె బ్యాగ్‌లో ఎలాంటి పేలుడు పదార్థాలు లేకపోవడంతో అధికారులు ఊపిరిపీల్చుకొన్నారు.

ఆమెను అదుపులోకి తీసుకొని విచారించారు. అల్లాహో అక్బర్, నేను ఉగ్రవాదిని అంటూ రోడ్డుపై పదేపదే నినాదాలు చేసినట్టు రష్యా టుడే కథనంలో పేర్కొన్నది. రష్యా ఇంటీరియర్ మంత్రిత్వశాఖ ఈ సంఘటన వాస్తవమేనని ధ్రువీకరించింది. శిశు సంరక్షణ కేంద్రాన్ని నడిపే ఆ యువతిని ఉజ్బెకిస్థాన్‌కు చెందిన గ్యుల్‌చెక్రా బోబోకులోవాగా గుర్తించారు. కాలిపోయిన బాలిక మృత దేహాన్ని సమీపంలోని ఫ్లాట్‌లో పోలీసులు కనుగొన్నారు. బాలిక తల్లిదండ్రులు అపార్ట్‌మెంట్ విడిచి వెళ్లేంతవరకు వేచి చూసిన మహిళ.. ఆ చిన్నారిని చంపి.. తలను దేహం నుంచి వేరు చేసింది. ఆ తర్వాత సాక్షాలను నాశనం చేయడానికి ఫ్లాట్‌కు నిప్పుపెట్టింది అని పోలీసులు పేర్కొన్నారు. డ్రగ్స్ మత్తులో ఆ మహిళ ఈ దారుణానికి పాల్పడి ఉంటుందనే అభిప్రాయాన్ని పోలీసులు వ్యక్తం చేశారు.