కాలేజ్ లో ప్రిన్సిపాల్ సమాధి.. బ్రతికి ఉండగానే

Posted: 04/06/2016 12:43 PM IST

కేరళలోని పలక్కాడ్‌లో గల ప్రభుత్వ విక్టోరియా కళాశాలలో గత మార్చి 31న ఓ వింత ఘటన చోటుచేసుకుంది. కళాశాల విద్యార్థులు బతికుండగానే ప్రిన్సిపాల్‌కు సమాధి కట్టారు. వివరాల్లోకి వెళితే… విక్టోరియా ప్రభుత్వ కాలేజీకి గత ఎనిమిది నెలల నుంచి ప్రిన్సిపాల్‌గా సరసు విధులు నిర్వహిస్తున్నారు. అయితే మార్చి 31న ఉదయం కళాశాలకు వచ్చిన ఆమెకు ఓ వింత సంఘటన ఎదురైంది. కాలేజీ ఆవరణలో ఒక సమాధి కట్టబడి ఉంది. దాంతో పక్కనే నిల్చున్న విద్యార్థిని ఇది ఎవరి సమాధి అని ఆమె అడిగారు. విద్యార్థి చెప్పిన సమాధానం విన్న ప్రిన్సిపాల్ షాక్ తింది.

ఆ విద్యార్థి ఏమాత్రం తడుముకోకుండా మీదే అంటూ సమాధానం ఇవ్వడంతో ప్రిన్సిపాల్ నిర్ఘాంతపోవల్సి వచ్చింది. ఈ నేపథ్యంలో ఘటనపై ఆమె విచారించగా… హాస్టల్ విద్యార్థులు ఆ రోజు ఉదయం 7 గంటల ప్రాంతంలో సమాధి తీసినట్టు తెలిసింది. ఈ ఘటనకు కారణమైన విషయాన్ని సరసు తెలుపుతూ.. తరగతుల బహిష్కరణకు, నిరసన తెలిపేందుకుగాను ఎస్‌ఎఫ్‌ఐ విద్యార్థులకు అనుమతి ఇవ్వలేదని, దాంతో విద్యార్థులు తనకు వీడ్కోలు బహుమతిగా ఘోరి ఇచ్చారన్నారు. ఈ ఘటనలో విద్యార్థులతోపాటు లెఫ్ట్ పార్టీలతో అనుబంధమున్న కొందరు టీచర్ల ప్రమేయం కూడా ఉన్నట్లు ప్రిన్సిపాల్ అనుమానం వ్యక్తం చేశారు. సరసు ఫిర్యాదు మేరకు పోలీసులు విద్యార్థులపై పరువు నష్టం కేసు నమోదు చేసి విచారణ చేపట్టినట్టు తెలుస్తోంది.

-Abhinavachary