బాహుబలి, రోబోలతో పాతాళభైరవి మాంత్రికుడు కలిస్తే..?

Posted: 05/05/2016 12:53 PM IST

Conversation between baahubali and robo with pathalabhairavi mantrikudu

పాతాళ భైరవి సినిమాలో నేపాలీ మాంత్రికుడు ఓ సారి ఆదిత్య369లోని టైం మెషీన్ ఎక్కడాట. అలా ఆ మెషీన్ పుణ్యమా అని ప్రస్తుతం మనం ఉంటున్న టైంలోకి వచ్చేశాడు. నేపాలీ మాంత్రికుడు వచ్చీ రాగానే బాహుబలి, రోబోలు కలిశారు. మరి ఈ ముగ్గురి మధ్యన సంభాషణ ఎలా ఉంటుందో చూడండి.

మాంత్రికుడు: ఓయీ. ఎవరు మీరు..? ఏమి రా.. ఇటుల ఉంటిది.. ఓ డింభకా నా మాటకు సమాధానమీయరా..
బాహుబలి: జై మాహిష్మతి. నేను మాహిష్మతికి రాజును ఇక ఇది (అంతలోనే రోబో అందుకుంటాడు)
రోబో: మై నేమ్ ఈజ్ చిట్టి.. స్పీడ్ వన్ టెరా బైట్. బైది బై హూ ఆర్ యు
మాంత్రికుడు: ఓరీ.. డింభకా.. ఏమిరా మాట్లాడుతుంటివి.. నీ మాటలు అర్థము కాకుండున్నవి రా..
రోబో: యు డోంట్ నో ఇంగ్లీష్.. ఓ సరే మీ కోసం తెలుగులోనే మాట్లాడతాను. ఇంతకీ మీ గురించి చెప్పనేలేదు.
మాంత్రికుడు: అతల సుతల పాతాల తలాతల లోకములలో నన్ను మించిన మహా మాంత్రికుడు లేడోయి. నేపాలీ మాంత్రికుడు అంటే ముల్లోకాల్లో తెలియని వాడు లేడు అర్భకులారా..?
బాహుబలి: అవును మాంత్రికుడుగారు మీరు ఎప్పటి వారు.. ఏమిటీ మీ బట్టలు ఇలా ఉన్నాయి
మాంత్రికుడు: నిజానికి నేను రాజుల కాలం నాటి వాడను.. కానీ పాతాళ భైరవి అనే సినిమా ద్వారా 1951లో వచ్చాను.
బాహుబలి: నేను కూడా అంతే చరిత్రలో ఎవరూ నన్ను గుర్తుపెట్టుకోలేదు కానీ రాజమౌళి అనే దర్శకుడు నాకు తిరిగి ప్రాణం పోశాడు
రోబో: నన్ను వసీకర్ తయారు చేశాడు. నాకు మరణం లేదు. మీరంటే అప్పట్లో చాలా భయమట కదా.. మరి మిమ్మల్ని చంపింది ఎవరు
మాంత్రికుడు: ఆ.. ఆ తోట రాముడు.. నా దగ్గర విద్య నేర్చుకొని నన్నే చంపేశాడు.
బాహుబలి: నా పరిస్థితి కూడా అంతే కట్టప్ప అనే నమ్మక ద్రోహి నన్ను చంపేశాడు.
రోబో: హ..హా.. నాన్నా నాకు అలా జరగలేదు. నన్నే నేనే నాశనం చేసుకున్న
మాంత్రికుడు: ఆహా.. ఏమిరా బాహుబలి.. నీవు వెండి తెర మీద కనక వర్షం కురిపించినావట..
బాహుబలి: అవును, మా రాజమౌళి తీసిన విధానం అలా కనక వర్షం కరిపించింది.
రోబో: అహ్హా.. రికార్డులు ఆయన తెచ్చుకున్నాడేమో కానీ నా గురించి మీకు తెలుసా..?
మాంత్రికుడు: నీ గోల ఏమిరా...?
రోబో: శంకర్ అనే మహా దర్శకుడు నన్ను తయారు చేశాడు. నా గురించి దేశం మొత్తం చర్చించింది తెలుసా..?
మాంత్రికుడు: ఓయీ.. అధిక ప్రసంగి.. నా ముందు నువ్వు ఆ చర్చ గురించి మాట్లాడతావా..? నా కాలంలో నేను చేసిన హడావిడి వింటే నీ చెవుల నుండి రక్తం కారుతుందిరా..
రోబో:ఆ అవకాశమే లేదు. ఎందుకంటే నాకు చెవులు లేవు. పైగా రక్తం కూడా లేదు
బాహుబలి: మీరు ఎంతలా మాట్లాడినా నా మీద ఉన్న అంచనాలకు కూడా మీరు సరిపోరు.
మాంత్రికుడు: నిన్ను తయారు చేయడానికి ఆ జిటపుటి మాయాదర్శిని(కంప్యూటర్), ఇంకను ఏమియో వాడినారట కదా.
బాహుబలి: అవును కానీ మీకు ఎక్కడా అలా చేసినట్లు కనిపించవు
రోబో: జిటపుటి మాయాదర్శిని అంటేనే నేను
మాంత్రికుడు: అయినను నేను ఎలాంటి సాంకేతిక పరిజ్ఞానం లేకున్ననూ అద్భుతమైన కళాఖండముగా మారినాను.
బాహుబలి: అవును మీ గురించి విన్నా.. అప్పట్లోనే మీరు చేసిన విన్యాసాల గురించి ఇప్పటికీ మా మాహిష్మతిలో మాట్లాడుకుంటారు.
మాంత్రికుడు: అయిననూ మరి మీ గురించి గొప్పలు చెప్పుకునెదరు ఏలరా.?
రోబో చూడు మాంత్రికుడు గారు.. గతం గతం కానీ నేను ఫ్యూచర్
బాహుబలి: నేను మాహిష్మతి కోసం ఎన్నో చేశాను తెలుసా..?
మాంత్రికుడు ఆపరా అధిక ప్రసంగి... నేను మాయా మంత్రములను పొందుటకు ఎంతటి కష్టం చేశానో తెలుసును రా..?
రోబో: మీ ఇద్దరి హిస్టరీ నా మెమొరీలో ఉంది.
మాంత్రికుడు అయిననూ మీరు డింభకులు.. నా ముందు మీరు అల్పులు
రోబో: ఏంటీ.. డింభకులు, అల్పులు.. ఆమ్లెట్ లు అంటున్నావు.
బాహుబలి: అందరి కన్నా నేను గొప్ప వ్యక్తిని.
మాంత్రికుడు నీ కనక వర్షం చూసుకొని అలా పొగరుబట్టి మాట్లాడుతున్నావు రా.. కానీ అప్పట్లోనే నేను కనక వర్షం అంటే ఏమిటో చూపించితిని. మీరు ఎన్ని చెప్పినను నేను గ్రేట్.