వాళ్లు మెడికోలు కాదు నిజంగా సైకోలు

Posted: 11/24/2016 10:00 AM IST

బాధ్యతతో కూడిన పవిత్రమైన వైద్య వృత్తిలో ఉంటూ సమాజం మొత్తం ఉమ్మెసే పనులు చేస్తున్నారు కొందరు. కొన్ని నెలల క్రితం చెన్నైలో ఓ మెడికో స్టూడెంట్ ఓ బిల్డింగ్ మీద నుంచి ఓ కుక్కను నిర్ధాక్షిణ్యంగా విసిరిపారేటయం, దానిని వీడియో తీసి సోషల్ మీడియాలో అప్ లోడ్ చేసి పైశాచిక ఆనందం పొందటం, జంతు ప్రేమికుల జోక్యం ఆ దుర్మార్గులకు శిక్ష పడటం చూశాం. ఇప్పుడు అంతకన్నా దారుణమైన ఘటనే బయటపడింది.

రాక్షస క్రీడతో పాపం ఓ కోతి పిల్లను కిరాతకంగా హింసించి మరీ బలి తీసుకున్నారు ఓ ముగ్గురు మెడికోలు. వెల్లూరుకి వంద కిలోమీటర్ల దూరంలోని క్రిస్టియానా మెడికల్ కాలేజీలో ఈ దారుణం బయటపడింది. ఓ మూగజీవాన్ని మాటల్లో కూడా చెప్పుకోలేని రీతిలో చంపేసి, దానిని ఖననం చేసిన ఘటన ఆలస్యంగా వెలుగులోకి వచ్చింది. ఆ తతంగం అంతా వీడియో పుటేజ్ రూపంలో బయటికి రావటంతో జంతు హక్కు పరిరక్షలు రోడెక్కి ఆందోళనకు దిగారు.

ఓ ముగ్గురు స్టూడెంట్లు బ్లాంకెట్ వేసి మరీ ఓ కోతి పిల్లను బంధించారు. ఆపై దాని చేతులు వెనక్కి కట్టేసి, టెలిఫోన్ వైర్ తో మెడకు ఉరేసి, బెల్ట్ తో కొడుతూ చంపేశారు. ఆ బాధతో అది విలవిలలాడుతుంటే ఆనందం పొందారని వీడియోను పోలీసులకు అప్పజెప్పిన జంతు సంరక్షణ బోర్డు సభ్యుడోకరు తెలిపారు. చివరికి దాని మర్మాంగంలోకి పదునైన ఆయుధాలను చొప్పించి హింసించారని ఆయన తెలిపాడు. శవాన్ని బయటికి తీసిన పోలీసులు పోస్ట్ మార్టం కోసం పంపించారు.

ఘటనపై స్పందించిన కాలేజీ యాజమాన్యం ఆ ముగ్గురు విద్యార్థులను సస్పెండ్ చేసినట్లు తెలిపింది. అయితే వారిలో ఇంతవరకు ఏ ఒక్కరినీ అరెస్ట్ చేయకపోవటం విశేషం. ప్రస్తుతం విచారణ జరుగుతోందని, పూర్తి విచారణ తర్వాత అరెస్ట్ లు ఉంటాయని పోలీసులు చెబుతున్నారు. మానవత్వం లేకుండా జరిగిన ఈ రాక్షస క్రీడపై ప్రస్తుతం సోషల్ మీడియాలో తీవ్ర స్థాయిలో విమర్శలు వినిపిస్తున్నాయి. మనిషి ప్రాణం ఒక్కటే ఈ భూమ్మీద విలువైంది కాదు కదా!