మాల్యా కన్నా మన ఎల్లయ్య ఎంతో బెటర్

Posted: 03/07/2017 08:17 AM IST

వేల కోట్లు ఎగ్గొట్టి దర్జాగా విదేశాల్లో జాలీగా గడుపుతూ, మధ్య మధ్యలో మీడియాపై విరుచుకుపడుతున్న విజయ్ మాల్యా గురించి కేంద్ర ప్రభుత్వం సంగతి ఏమోగానీ, సుప్రీం కోర్టు మాత్ర స్పందించింది. అంతేకాదు ఓ కేసును అడ్డుపెట్టుకుని ఆసక్తికర వ్యాఖ్యలు చేసింది. ఇంతకీ ఆ కేసు ఎక్కడిదో కాదు. మన తెలుగు రాష్ట్రానికి సంబంధించింది కావటమే ఇక్కడ కొసమెరుపు.

ఎల్లయ్య అనే వ్యక్తి చీరల దొంగతనం కేసులో గతేడాది హైదరాబాద్ పోలీసులు అరెస్ట్ చేశారు. అయితే ట్రయల్ లేకుండానే అతగాడు ఏడాదిగా శిక్ష అనుభవిస్తున్నాడు. కేవలం ఐదు చీరలు దొంగతనం చేసినందుకే తన భర్తను విచారణ కూడా లేకుండా పోలీసులు అక్రమంగా అరెస్ట్ చేశారంటూ అతని భార్య సుప్రీం కోర్టులో పిటిషన్ దాఖలు చేసింది.

ఈ కేసు ధర్మాసనం ముందుకు రాగా న్యాయమూర్తి జేఎస్ ఖేహర్ మాల్యాను ఉద్దేశించి వ్యాఖ్యలు చేశాడు. ‘‘ ఓ వ్యక్తి ఉన్నాడు. బ్యాంకుల నుంచి కోట్ల రుణాలు తీసుకుని ఎగ్గొట్టి విదేశాలకు పారిపోయాడు. పైగా అక్కడ లగ్జరీ లైఫ్ అనుభవిస్తున్నాడు. కానీ, ఇక్కడో వ్యక్తి ఐదు చీరలు దొంగతనం చేశాడని బోనులో నిలబెట్టారు. ఇది ఎంత దారుణం’’ అంటూ పరోక్షంగా మాల్యా గురించి వ్యాఖ్యలు చేశాడు. ఇక ఎలాంటి ఆధారాలు లేకుండా ఎల్లయ్యను అరెస్ట్ చేశారని అతని తరపు న్యాయవాది వాదించగా, చీరల దొంగతనం గురించి షాపు యజమానులు ఇచ్చిన ఫిర్యాదు ఆధారంగానే తాము అదుపులోకి తీసుకున్నామని తెలంగాణ ప్రభుత్వం తెలిపింది. ఈ కేసు బుధవారం మళ్లీ విచారణకు రానుంది.

61 ఏళ్ల మాల్య కింగ్ ఫిషర్ ఎయిర్ లైన్స్ కుప్పకూలిపోవటంతో 9,000 కోట్ల రుణాలు ఎగ్గొట్టి యూకే పారిపోయిన(మాల్యా దృష్టిలో తలదాచుకోవటం) విషయం తెలిసిందే. ఈ మధ్యే తాను అక్కడ సురక్షితంగా ఉన్నానని చెప్పటమేకాదు, తనను భారత్ కు తీసుకెళ్లే హక్కు ఎవరికీ లేదంటూ కామెంట్ కూడా చేశాడు.

 

ఇవి కూడా చదవండి...

 

ఆర్థిక నేరం కాదు.. ఉత్త అమాయకుడేనంట!

ఆల్ ఈజ్ వెల్ అంటున్న మాల్యా