వేధింపులు భరించలేక జవాన్లు ఏం చేశారంటే...

Posted: 04/03/2017 11:06 AM IST

సుమారు 200 మంది జవాన్లు తమ సమస్యలపై ప్రధాని నరేంద్ర మోదీకి లేఖలు రాశారు. అయినా సమస్యలు పరిష్కారం కాలేదు. దీంతో ఏకంగా న్యాయ వ్యవస్థ తలుపును తట్టారు. కర్ణాటక హైకోర్టు లో సీఎస్ ఎఫ్ జవాన్లంతా మూకుమ్మడిగా ఈ కేసు నమోదు చేయటంతో ఒక్కసారిగా హాట్ టాపిక్ గా మారిపోయింది.

వీరంతా కెంపెగౌడ అంతర్జాతీయ విమానాశ్రయంలో భద్రతా సిబ్బందిగా బాధ్యతలు స్వీకరిస్తున్నారు. అయితే వీరికి సరైన సదుపాయాలతోపాటు, వేధింపులు కూడా అధికం అవుతున్నాయంట. ఈ విషయాన్ని ఉన్నతాధికారుల దృష్టికి తీసుకెళ్లినా సమస్య పరిష్కారం కాలేదు. కొంత మంది మోదీ దృష్టికి తీసుకెళ్లినా ప్రయోజనం లేకపోయింది.

దీంతో నేరుగా బెంగళూర్ హైకోర్టులో కేసు ఫైల్ చేశారు. తిండి చాలా చండాలంగా ఉంటుంది. విశ్రాంతి లేకుండా విధులను నిర్వహించాల్సి వస్తుంది. ఇంటి అద్దె, రావాల్సిన చాలా అలవెన్సులు రావటం లేదు. పైగా సీనియర్ల నుంచి వేధింపులు, జీతాలు సరిగ్గా ఇవ్వకపోవటం లాంటివి జరుగుతున్నాయంటూ వారు వాపోతున్నారు. సెంట్రల్ ఆర్మ్డ్ పోలీస్ ఫోర్సెస్ (సీఎఫీఎఫ్) కింద ఉన్న వివిధ విభాగాల్లో పని చేస్తున్న ఉద్యోగుల తీవ్ర ఒత్తిడి, వేధింపులు, దుర్భర పరిస్థితులతో గత మూడేళ్లలో 344 మంది ఆత్మహత్య చేసుకోవటం చూస్తే పరిస్థితి ఎంత దారుణంగా ఉందో అర్థమౌతుంది.

ఇందులో 53 మంది సీఐఎస్ఎప్ కి చెందిన వారు కావటం గమనార్హం. ఈ జనవరిలోనే ఇదే ఎయిర్ పోర్ట్ లో విధులు నిర్వహించిన గైక్వాడ్ సురేష్ సర్వీస్ తుపాకీతో కాల్చుకుని సూసైడ్ చేసుకోగా, కుటుంబ కలహాలు అని అధికారులు, లేదు సీనియర్ల వేధింపులు అని తోటి జవాన్లు ఆరోపించారు.