కన్నీటి వీడ్కోలతో కడసారి యాత్ర.. జనకడలిగా మారిన చెన్నై

Posted: 08/08/2018 04:14 PM IST

డీఎంకే అధ్యక్షుడు, మాజీ ముఖ్యమంత్రి కళైంజ్ఞర్ కరుణానిధి అంతిమ యాత్ర ప్రారంభమైంది. డీఎంకే పార్టీ కార్యకర్తలు, నేతలు, అభిమానులు, పలువురు రాజకీయ వేత్తలు, సాహితీవేత్తలు, సీనీ, నాటక రంగ ప్రముఖులతో చెన్నై వీధులు జనకడలిని తలపించాయి. వారి కరుణాసాగరుడి కడసారి యాత్రలో పాల్గోన్న కార్యకర్తలు కన్నీరు కారుతున్నా.. డాక్టర్ కళైంజ్ఞర్ అమర్ రహే అంటూ పెద్దపెట్టున నినాదాలు చేస్తూ ముందుకు సాగుతున్నారు. అభిమానుల అశ్రునయనాల మధ్య సాగుతున్న కరుణానిధి అంతిమయాత్ర అయన అభిమానుల నిధిగా, కార్యకర్తల గనిగా తలపించింది.

ఆయన పార్థివదేహాన్ని త్రివిధ దళాలకు చెందిన సిబ్బంది తమ భూజాలపై మోస్తూ... అంతిమయాత్ర వాహనంలోకి చేర్చారు. ఈ సందర్భంగా అక్కడే ఉన్న వేలాది మంది హృదయాలు బరువెక్కాయి. అక్కడున్న వారంతా తీవ్ర భావోద్వేగానికి గురై, కంటతడి పెట్టారు. అశేష జనవాహిని కరుణ పార్థివ దేహం వెంట నడుస్తూ మెరీనా బీచ్ వైపు కదిలారు. ఈ అంతిమయాత్ర రాజాజీ హాల్ నుంచి వాలాజా రోడ్, చేపాక్ స్టేడియంల మీదుగా మెరీనాకు చేరుకుంటుంది. సాయంత్రం ఆరు గంటలకు మెరీనా బీచ్ లోని అన్నా స్క్వేర్ లో ప్రభుత్వ లాంఛనాలతో అంతిమ సంస్కారాలు జరుగుతాయి.