హస్తినలో ఘనంగా గణతంత్ర వేడుకలు.. అకట్టుకున్న మహిళా సైనిక కవాతు

Posted: 01/26/2019 10:08 AM IST

Republic day 2019 india displays military might cultural grandeur at rajpath

దేశరాజధాని ఢిల్లీలో ఘనంగా గణతంత్ర దినోత్సవ వేడుకలు నిర్వహించారు. ఇండియా గేట్ వద్ద అమరవీరులకు ప్రధాని మోదీ నివాళులర్పించారు. ఈ సందర్భంగా జాతీయ జెండాను రాష్ట్రపతి రామ్‌నాథ్ కోవింద్ ఆవిష్కరించారు. ఈ సందర్భంగా కోవింద్ త్రివిధ దళాల నుంచి గౌరవ వందనం స్వీకరించారు. 70 ఏళ్ల భారత గణతంత్ర మహోత్సవానికి ముఖ్య అతిథిగా దక్షిణాఫ్రికా అధ్యక్షుడు సిరిల్ రామఫోసా హాజరయ్యారు. మరోవైపు రిపబ్లిక్ డే పరేడ్‌లో వివిధ రాష్ట్రాలకు చెందిన 17 శకటాలు ప్రదర్శించారు.

కశ్మీరి నజీర్ అహ్మద్ వనీ కుటుంబ సభ్యులకు అశోక్ చక్రను ప్రధానం చేశారు. . రాష్ట్రపతి చేతుల మీదుగా నజీర్ భార్య ఈ పురస్కారం అందుకున్నారు. ఓ కశ్మరి ఈ అవార్డు అందుకోవడం ఇదే తొలిసారి. 308 మంది సైనిక సిబ్బందికి శౌర్య పురస్కారాలు అందించారు. ఒకరికి అశోక చక్ర. ఇద్దరికి కీర్తి చక్ర పురస్కారాలు ప్రదానం చేశారు. రాజ్‌పథ్‌లో ఘనంగా నిర్వహించిన రిపబ్లిక్ డే వేడుకలకు పెద్ద ఎత్తున ప్రజలు కూడా హాజరయ్యారు. చిన్నా పెద్ద అంతా ఈ వేడుకల్లో పాల్గొన్నారు.

ఆకట్టుకున్న మహిళా సైనిక శక్తి పరేడ్..

గణతంత్ర దినోత్సవ వేడుకల్లో భాగంగా రాజ్ పథ్ లో జరిగిన పరేడ్‌లో మహిళా సైనిక శక్తి నిర్వహించిన కవాతు ప్రత్యేక ఆకర్షణగా నిలిచింది. పూర్తి మహిళా బృందం‌తో పాటు పలు బృందాలకు మహిళలు నాయకత్వం వహించారు. మహిళలతో కూడిన అసోం రైఫిల్స్‌ బృందం పరేడ్ లో అద్భుత ప్రదర్శన ఇచ్చింది. వీరి బృందానికి మేజర్‌ కుష్బూ కన్వార్‌ నాయకత్వం వహించారు. పూర్తిగా మహిళలతో కూడిన పారామిలటరీ బృందం రాజ్ పథ్‌ వేడుకల్లో పాల్గొనడం ఇదే తొలిసారి.

కార్ప్స్‌ ఆఫ్ సిగ్నల్స్ కు చెందిన కెప్టెన్‌ శిఖా సురభి పరేడ్లో ప్రత్యేక ఆకర్షణగా నిలిచారు. డేర్ డెవిల్స్‌ బృందంలో భాగంగా పురుషులతో పాటు ఆమె చేసిన బైక్‌ విన్యాసాలు ఎంతగానో ఆకట్టుకున్నాయి. బైక్ పై నిలబడి అమె చేసిన అభివాదానికి రాజ్ పథ్ కరతాళధ్నులతో మార్మోగాయి. దీంతో పాటు సైనిక, నావికా దళ బృందాల్లో కూడా పలువురు మహిళా అధికారులు నాయకత్వం వహించారు.