న్యూస్ ఎక్స్ ప్రీపోల్ సర్వే: ఈ దఫా కూడా గత ఎన్నికల చిత్రమే..

Posted: 04/05/2019 03:09 PM IST

Newsx prepoll survey on andhra pradesh assembly and lok sabha polls

ఆంధ్రప్రదేశ్ లో రాజకీయ ముఖచిత్రం ఎలా వుంది.. ఓటరు నాడి ఎలా వుంది అన్న అంచనాల నేపథ్యంలో అసోసియేషన్ అఫ్ డెమెక్రాటిక్ రిఫామ్స్ వెల్లడించిన నివేదిక ప్రకారం చంద్రాబాబు పాలన బిలో అవరేజ్ అని తేల్చింది. అయితే పట్టణ ఓటర్లు మాత్రం ఆయన పాలన పర్వాలేదని అన్నా.. గ్రామీణ ఓటరు మాత్రం అసంతృప్తిని వ్యక్తం చేశారు. అయితే ఇదే సమయంలో ప్రజల నాడి ఎలా వుందన్న విషయం కూడా అస్పష్టంగా నిగురుగప్పిన నిప్పులా వుందని తేల్చింది.

కాగా న్యూస్ ఎక్స్ ఛానెల్ వెల్లడించిన నివేదికలో ఈ సారి కూడా గత ఫలితాలే వ్యక్తం అవుతాయని తేల్చింది. అయితే బీజేపీ ప్రాతినిధ్యం వహిస్తున్న విశాఖపట్నం, నరసాపురం లోక్ సభ సీట్లను టీడీపీ, వైసీపీలు చెరొకటి గెలుచుకుంటాయని అంచనా వేసింది. న్యూస్ ఎక్స్ ఛానెల్ తో పాటు ఫేస్ బుక్, యూ-ట్యూబ్ లు సంయుక్తంగా నిర్వహించిన పోల్ సర్వేలలో ఈ వివరాలు వెల్లడించింది. మొత్తం 25 స్థానాల్లో టీడీపీకి 16, వైసీపీకి 9 స్థానాలు రావచ్చని పేర్కోంది.

టీడీపీకి 43 శాతం ఓట్లు వైసీపీకి 37 శాతం ఓట్లు రావచ్చని, బీజేపీ 7 శాతానికి, కాంగ్రెస్ 6 శాతానికి, ఇతరులు 7 శాతం ఓట్లకు పరిమితం కావచ్చని తెలిపింది. టీడీపీ, వైసీపీ మినహా మరే ఇతర పార్టీకి లోక్ సభ స్థానాలు గెలిచే సత్తా లేదని అంచనా వేసింది. గత ఎన్నికలతో పోలిస్తే ఇరు పార్టీలూ చెరో సీటును గెలుచుకోవడం ద్వారా రాష్ట్రంలో బీజేపీకి ప్రాతినిధ్యం లేకుండా చేస్తాయని వెల్లడించింది. ఇక అసెంబ్లీ సీట్ల విషయానికి వస్తే, టీడీపీకి 92, వైఎస్ఆర్ కాంగ్రెస్ పార్టీకి 77, కాంగ్రెస్ కు 4, బీజేపీకి 1, ఇతరులకు ఒక సీటు రావచ్చని అంచనా వేసింది.

ఈ దఫా ఎన్నికలు పోటా పోటీగా జరగనున్నాయని పేర్కొంది. అయితే ఈ సర్వేలో డొల్లతనం స్పష్టంగా కనిపిస్తుందని తృతీయ ప్రత్యామ్నాయంగా ఎదిగి ప్రత్యర్థి పార్టీల వెన్నులో వణుకు పుట్టిస్తున్న జనసేనకు పార్లమెంటు స్థానాలను రావని, ఇక అసెంబ్లీలో కూడా జనసేన ఒక్కసీటుతో సరిపెట్టుకోవాల్సి వస్తుందని చెప్పడం.. ఇది కూడా ఎల్లో మీడియా విషప్రచారం మాదిరిగానే వుందని విమర్శలు వినపిస్తున్నాయి.