కాపుల ఆత్మీయ కలయికలో విజయసాయిరెడ్డికి పరాభవం..

Posted: 12/16/2019 11:22 AM IST

విశాఖపట్టణంలో నిర్వహించిన ‘కాపుల ఆత్మీయ కలయిక’ సభలో వైసీపీ ఎంపీ విజయసాయిరెడ్డికి పరాభవం ఎదురైంది. తాదివరకెన్నడూ ఎరుగని, ఊహించని అనుభవం కావుల ఆత్మీయ కలయికలో ఆయన చవిచూశారు. జిల్లాలోని కండాల కొండలో కాపులు ఆత్మీక కలయిక కార్యక్రమాన్ని ఏర్పాటు చేశారు. ఈ కార్యక్రమానికి మంత్రి అవంతి శ్రీనివాస్ తో పాటు విజయసాయిరెడ్డి, పలువురు జిల్లాకు చెందిన వైసీపీ నేతలు కూడా హాజరయ్యారు.

విజయసాయిరెడ్డితో పాటు పలువురు వైసీపీ నేతలను చూసిన కాపులు మండిపడ్డారు.ఉన్నఫలంగా విజయసాయిరెడ్డికి వ్యతిరేకంగా పెద్దపెట్టున నినాదాలు చేశారు. అంతేకాదు ‘జై  కాపు.. జైజై కాపు’ అని నినదించారు. కాపుల సమావేశానికి వైసీపీ నేతలందరూ ఎలా వస్తారని కార్యక్రమానికి వచ్చిన ఇతర నేతలను ఉద్దేశించి ప్రశ్నించారు. దీంతో కార్యక్రమంలో కొంతసేపు రసాభసగా సాగింది. ఈ సందర్భంగా మంత్రి అవంతి మాట్లాడుతూ.. ఆగ్రహం వ్యక్తం చేశారు. తాను మంత్రి పదవిలో ఉండడం వల్లే సహనంగా ఉన్నానని తీవ్ర స్వరంతో అన్నారు. జిల్లా నుంచి  తనకు మాత్రమే మంత్రి పదవి దక్కిందన్నారు.

కాగా, పలువురు నేతలు కాపు రిజర్వేషన్ గురించి మాట్లాడగా మంత్రి అవంతి అడ్డుకున్నారు. ఈ కార్యక్రమంలో అటువంటివి మాట్లాడడం సరికాదని ఆగ్రహం వ్యక్తం చేశారు. అంతకుముందు విజయసాయిరెడ్డి కాపు సభ్యులను శాంతింపజేసేందుకు ప్రయత్నించారు. తానూ కాపునేనని వారికి నచ్చజెప్పే ప్రయత్నం చేశారు. రేపు తాను చనిపోయినప్పుడు తన డెత్ సర్టిఫికెట్ మీద కూడా అదే ఉంటుందన్నారు. అయినా ఆయన మాటలను అలకించేందుకు కొందరు కాపులు సుముఖంగా లేకపోవడంతో.. ఆయన బదులుగా అవంతి మాట్లాడారు.