జమాత్ కు హాజరైన విదేశీయులపై కేంద్రం చర్యలు.. వీసాలు రద్దు

Posted: 04/02/2020 09:50 PM IST

960 foreigners linked to tablighi jamaat blacklisted visas cancelled by mha

ప్రపంచవ్యాప్తంగా తన ప్రభావాన్ని చాటుతూ వేలాది మందిని పోట్టనబెట్టుకున్న కరోనా వైరస్ దేశంలోకి ప్రవేశించడంతో అప్రమత్తమైన కేంద్ర, రాష్ట్రప్రభుత్వాలు.. ముందస్తు నియంత్రణ చర్యల్లో భాగంగా లాక్ డౌన్ విధించాయి. అంతకుముందే కరోనా కలకలం రేగుతున్న సమయంలోనే గుంపులుగా గుంపులుగా జరిగే కార్యక్రమాలకు పెళ్లిళ్లు, సభలు,సమావేశాలు, మతప్రబోధాలు ఇలాంటివి నిర్వహించకుండా దేశవ్యాప్తంగా మార్చి 3వ తేదీనే అంక్షలను అమల్లోకి తీసుకువచ్చింది. అయినా ఆ అదేశాలను పట్టించుకోకుండా.. విదేశాలకు చెందిన వందల మంది అతిధులను రప్పించి మరీ ఢిల్లీలోని నిజాముద్దీన్ మర్కజ్ మసీదులో మతప్రబోధ కార్యక్రమాలను నిర్వహించారు.

దీంతో పాటు ప్రబోధ కార్యక్రమాలు పూర్తైన తరువాత కొన్న రోజుల పాటు విదేశీయులు ఏకంగా దేశంలోని నలుమూలలా సంచరించి ఆయా ప్రాంతాల్లో మన భారతీయ మస్లింల ఇళ్లలో ఆశ్రయం పోందారు. దీంతో కరోనావైరస్ ను వారు దేశవ్యాప్తంగా ప్రబలేందుకు కారణమయ్యారు. అయితే ఇది అనుకున్న విధంగా పథకం ప్రకారమే జరిగిందా.? లేక అనుకోకుండా జరిగిందా.? అన్నది మాత్రం తెలియాల్సి వుంది. ఏదీ ఏమైనా విదేశీయులు మన దేశానికి పర్యాటకుడిగా వచ్చిన సందర్భంలో మతప్రబోధ కార్యక్రమాలలో పాల్గోనేందుకు అవకాశం లేదు. ఇలా పాల్గోన్న పక్షంలో వారు భారత రాజ్యాంగాన్ని ఉల్లంఘించడమే అవుతుంది.

నిబంధనలు ఉల్లంఘించి ఢిల్లీలోని తబ్లీగీ జమాత్‌ కార్యక్రమంలో పాల్గొన్న పర్యాటకులకు భారత ప్రభుత్వం తేరుకోలేని షాక్ ఇచ్చింది. భారత వీసా నిబంధనలను ఉల్లంఘించి మరీ మసీదులో మతప్రబోధ కార్యక్రమాల్లో పాల్గోన్న 960 మంది విదేశీయుల వీసాలను రద్దు చేయడంతో పాటు వారి పాస్‌పోర్టులను బ్లాక్ లిస్ట్ లో పెడుతూ కేంద్ర హోం మంత్రిత్వశాఖ నిర్ణయం తీసుకుంది. ఆ విదేశీయులపై చర్యలు తీసుకోవాలని అన్ని రాష్ట్రాల డీజీపీలను ఆదేశించింది. ఈ మేరకు కేంద్ర హోంమంత్రి అమిత్ షా కార్యాలయం ట్వీట్‌ చేసింది.

పర్యాటక వీసాలపై వచ్చిన పలువురు విదేశీయులు నిబంధనలకు విరుద్ధంగా మతపరమైన కార్యక్రమాల్లో పాల్గొన్నందుకు వారిపై చర్యలు తీసుకుంటున్నట్లు హోంశాఖ మంత్రి కార్యాలయం ట్వీట్‌లో వెల్లడించింది. విదేశీయుల చట్టం-1946, విపత్తు నిర్వహణ చట్టం -2005ను వారు ఉల్లంఘించి నిజాముద్దీన్‌లోని తబ్లీగీ జమాత్‌లోని మతపరమైన కార్యక్రమంలో పాల్గొన్నందున..నిబంధనల ప్రకారం వారిపై చర్యలు తీసుకోవాలని డీజీపీలకు కేంద్ర హోంశాఖ ఆదేశాలు జారీ చేసింది. అయితే ఈ విషయం తెలిసి కూడా పలు దేశాల నుంచి వచ్చిన ముస్లిం మత పెద్దలు ఎలా పాల్గోన్నారనేదే చర్చనీయాంశంగా మారింది.