దేశవ్యాప్తంగా 56 వేలు దాటిన కరోనా కేసులు.. 1886 మరణాలు

Posted: 05/08/2020 10:26 AM IST

దేశంలో కరోనా విజృంభన వేగంగా కోనసాగుతోంది. రోజుకు వెయి మంది పైచిలుకు వరకు మాత్రమే పరిమితం అయిన వ్యాప్తి క్రమంగా వేగాన్ని అందుకుని ప్రతి రోజు మూడు వేల మందిని తన ప్రభావం బారిన పడవేస్తోంది. దేశంలో ఎలాంటి సడలింపులు లేకుండా కఠినంగా లాక్ డౌన్ అమలు చేసిన సందర్భంగా రెండో విడత వరకు నెమ్మెదిగా పయనించిన కరోనా వైరస్ మహమ్మారి మూడవ లాక్ డౌన్ లో సడలింపులతో వేగాన్ని పెంచింది. దేశంలో అత్యధిక సంఖ్యలో వ్యాప్తి చెందుతున్న కరోనా మహమ్మారి వ్యాప్తి కూడా రికార్డు స్థాయిలో కొనసాగుతోంది. దేశంలో అథ్యధిక మార్కును ఇప్పటికే అందుకున్న కరోనా.. రెండో స్థాయి, మూడో స్థాయి గరిష్ట స్థాయిని కూడా నమోదు చేసుకుంది. కాగా ఇవాళ తాజాగా నమోదూన సంఖ్య తృతీయ గరిష్టస్థాయిని అందుకుంది.

గడిచిన 24 గంటల వ్యవధిలో 3390 కరోనా పాజిటివ్ కేసులు నమోదయ్యాయి. దేశంలో ఈ స్థాయిలో కరోనా కేసులు ఒక్కరోజులో బయటపడటం ఇది మూడవసారి. రెండు రోజుల క్రితం అత్యధికంగా 3900 సంఖ్య నమోదైన తరువాత అస్థాయిలో క్రితం రోజున మూడు వేల ఐదు వందల సంఖ్యలో ప్రభావితం చేసిన కరోనా తాజాగా తృతీయ గరిష్టస్థాయిలో దేశప్రజలను ప్రభావితం చేసింది. దీంతో దేశవ్యాప్తంగా కరోనా పాజిటివ్ కేసుల సంఖ్య 56 వేల మార్కును దాటింది. దేశవ్యాప్తంగా మొత్తం 56 వేల 342 మందిని ఈ మహమ్మరి తన ప్రభావానికి గురిచేసింది. ఇక కరోనా వైరస్ బారిన పడి మరణిస్తున్న వారి సంఖ్య కూడా అంతకంతకూ పెరుగుతోంది. గడిచిన 24 గంటల వ్యవధిలో దేశంలో 108 మరణాలు సంభవించడంతో దేశంలో మొత్తం మరణాల సంఖ్య 1886కు చేరింది.

దీంతో వైరస్‌ బారిన పడిన వారిలో ఇప్పటి వరకు 16540 మంది కోలుకున్నారని కేంద్ర వైద్య ఆరోగ్య మంత్రిత్వ శాఖ తెలిపింది. ఇక 37,916 మంది మాత్రం వివిధ ఆసుపత్రుల్లో చికిత్స పోందుతున్నారు. గతకొన్ని రోజులుగా కరోనా నుంచి కోలుకుంటున్నవారి సంఖ్య పెరగడం కాస్త ఊరటనిస్తోండగా, రానున్న రోజుల్లో కరోనా తీవ్రత మరింత పెరిగే అవకాశాలు వున్నాయని కూడా నిపుణులు అంచనా వేస్తున్నారు. మహారాష్ట్రలో గడిచిన 24 గంటల వ్యవధిలో ఏకంగా 1216 మంది దీని ప్రబావం బారిన పడ్డారు. మహారాష్ట్రంలోనే ఏకంగా గడిచిన 24 గంటల వ్యవధిలో 43 మరణాలు సంభవించాయి. దీంతో రాష్ట్రం మొత్తం మీద కరోనా వైరస్ బారిన పడినవారి సంఖ్య 17, 974కు చేరగా, 694 మంది అసువులుబాసారు. మహారాష్టలో నమోదైన కేసుల్లో అత్యధికంగా దేశ అర్థిక రాజధాని ముంబైలోనే నమోదయ్యాయి.

తమిళనాడులోనూ మూడు రోజులుగా వైరస్ విజృంభిస్తోంది. గడిచిన 24 గంటల వ్యవధిలో ఏకంగా 580 కరోనా పాజిటివ్ కేసులు నమోదయ్యాయి. దీంతో రాష్ట్రంలో మొత్తం కరోనా కేసులు 5వేల మార్కు దాటింది. మొత్తంగా 5409 మందికి కరోనా 37 మంది మరణించారు. తమిళనాడు రాజధాని చెన్నైలోనే కరోనా తీవ్రత అధికంగా వుంది. చెన్నైలోని కోయంబేడు మార్కట్ కేంద్రంలో ఇటీవల కరోనా కేసులు అధికంగా వెలుగుచూడటంతో ప్రస్తుతం ఈ మార్కెట్ కరోనాకు కేరాఫ్ గా మారింది. అటు గుజారాత్ లోనూ నిన్న ఒక్కరోజులో 387 కేసులు నమోదుకాగా, మొత్తం కేసులు సంఖ్య 7012కు చేరగా, ఇప్పటి వరకు 425 మంది మరణించారు.