కల్పవృక్ష వాహనంపై తిరుమల శ్రీవారు.. రాత్రి సర్వభూపాల వాహనుడై..

Posted: 10/19/2020 05:07 PM IST

తిరుమల శ్రీవారి నవరాత్రి బ్రహ్మోత్సవాలు వైభవంగా కొనసాగుతున్నాయి. బ్రహ్మోత్సవాలలో నాల్గవ రోజు ఉదయం మలయప్పస్వామి కల్పవృక్ష వాహనంపై విహరించారు. శ్రీ‌దేవి, భూదేవి స‌మేత శ్రీ మలయప్పస్వామివారు క‌ల్ప‌వృక్ష వాహనంపై రాజ‌మ‌న్నార్‌ అలంకారంలో అభ‌య‌మిచ్చారు. క్షీరసాగర మథనంలో ఉద్భవించిన విలువైన వస్తువులలో కల్పవృక్షం ఒకటి. ఈ కల్పవృక్షం నీడన సేద తీరేవారికి ఎలాంటి ఆకలిదప్పికలు వుండవని, పూర్వజన్మ స్మరణ కూడా కలుగుతుందని భక్తుల విశ్వాసం. మిగతా వృక్షాల మాదిరిగా అవి కాసిన ఫలాలను అందించే చెట్లకు భిన్నంగా కల్పవృక్ష వాహనం కోరిన ఫలాలన్నింటినీ అందిస్తుందని భక్తుల నమ్మకం.

అలాంటి కల్పవృక్ష వాహనంపై నాలుగో రోజు బ్రహ్మోత్సవాలలో భాగంగా ఇవాళ పద్మావతి, అలిమేలుమంగలతో రాజమన్నార్ అలంకారంలో శ్రీవారి ఆలయంలోని కల్యాణమండపంలో ఊరేగిన శ్రీవారు అభయ ప్రధానం చేశారు, మంగళ వాయిద్యాలు, పండితుల వేదమంత్రోచ్ఛరణల నడుమ అర్చకులు వైదిక కార్యక్రమాలను శాస్త్రోక్తంగా నిర్వహించారు. కరోనా ప్రభావంతో ఉత్సవాలను ఆలయానికే పరిమితం చేశారు. ప్రతీఏడు కలియుగ వైకుంఠమైన తిరుమల పవిత్ర తిరుమాడ వీధుల్లో ఊరేగుతూ భక్తజన సందోహానికి అభయప్రధానం చేసే శ్రీవారు ఈ సారి కరోనా నేపథ్యంలో ఆలయానికి మాత్రమే ఉత్సవాలు పరిమితమయ్యాయి, ఇవాళ రాత్రి బ్రహోత్సవాలలో భాగంగా తిరుమల దేవదేవుడు సర్వభూపాలవాహనంపై దర్శనమివ్వనున్నారు. తితిదే ఈవో జవహర్‌రెడ్డి, అర్చకులు కార్యక్రమంలో పాల్గొన్నారు.