ఫాస్ట్ ట్యాగ్ లేని వాహనాలకు అదనపు వాయింపులు.. రాత్రి నుంచే అమలు

Posted: 02/15/2021 12:00 PM IST

టోల్ గేట్ల వద్ద పన్ను చెల్లింపులను సరళతరం చేసే ఫాస్ట్ ట్యాగ్ విధానం ఇవాళ అర్థరాత్రి నుంచి తప్పనిసరి చేసింది భారత రోడ్డు రవాణా సంస్థ. అయినా ఫాస్ట్ ట్యాగ్ లేకుండా వెళ్లే వాహనాలకు షాక్ ఇచ్చేందుకు కూడా కేంద్ర రోడ్డు, రావాణా సంస్థ సిద్దమైంది. ఫాస్ట్ ట్యాగ్లను ఏర్పాటు చేసేందుకు ప్రభుత్వం విధించిన గడువు ఇవాళ్టితో ముగిసిపోనుంది. ఈ గడువును మరోసారి పొడిగించబోమని కేంద్ర రవాణా శాఖ మంత్రి నితిన్ గడ్కరీ ఆదివారం నాడు స్పష్టమైన ప్రకటన చేశారు. అంతేకాదు ఇకపై ఫాస్ట్ ట్యాగ్ లేని వాహనాదారులకు అదనపు వాయింపులు కూడా తప్పవని ఆయన హెచ్చరించారు.

దేశంలోని ప్రతీ వాహనం ఫాస్ట్ ట్యాగ్ లను తీసుకోవడం తప్పనిసరి అని ప్రకటించిన ఆయన ఇకపై కూడా ఫాస్ట్ ట్యాగ్ వినియోగించని వాహనాలు టోల్ గేట్ల వద్ద రెండింతల చార్జీ చెల్లించుకోవాల్సి ఉంటుందని అన్నారు. ప్రధాన రహదారులతో పాటు జాతీయ, రాష్ట్రీయ రహదారులపై ట్రాఫిక్ ప్రవాహాన్ని మరింత వేగవంతం చేసేందుకు ప్రభుత్వం ఫాస్ట్ ట్యాగ్ విధానాన్ని ప్రవేశపెట్టింది. ఈ విధానంలో టోల్ గేట్ల వద్ద ఉండే ప్రత్యేకమైన సెన్సర్లు వాహనంపై అమర్చిన ఫాస్ట్‌ట్యాగ్‌ను రీడ్ చేసి టోల్ చార్జీలను స్వీకరిస్తాయి.

ఈ మొత్తం వ్యవహారం ఆటోమెటిక్ విధానంలో, టోల్ సిబ్బంది కలుగ చేసుకోవాల్సిన అవసరం లేకుండానే జరిగిపోతుంది. ప్రీపెయిడ్ విధానంలో ప్రేశపెట్టిన ఈ ఫాస్ట్‌ట్యాగ్‌ వ్యాలెట్లలో నగదు అయిపోయిన ప్రతిసారీ వాహనదారులు రీచార్జ్ చేయడం ద్వారా నగదు నింపాల్సి ఉంటుంది. టోల్ గేట్ సిబ్బందికి చెల్లింపులు జరిపే పాత విధానాని ఫాస్ట్ ట్యాగ్‌ పద్ధతి ముగింపు పలకనుంది. ఫలితంగా.. టోల్ గేట్ల వద్ద వాహనాలు బారులు తీరాల్సిన అగత్యం తప్పి ట్రాఫిక్ మరింత సాఫీగా సాగిపోతుంది.