కాంగ్రెస్ పార్టీలో చేరేదిలేదన్న దానం నాగేందర్.. రేవంత్ పై ఫైర్

Posted: 07/02/2021 06:50 PM IST

కాంగ్రెస్ పార్టీ మల్కాజ్ గిరి పార్లమెంటు సభ్యుడు రేవంత్‌ రెడ్డిని టీపీసీసీ అధ్యక్షుడిగా ప్రకటించిన నేపథ్యంలో ఆ పార్టీకి పూర్వవైభవాన్ని తీసుకువచ్చేందుకు తన శక్తివంచన లేకుండా ప్రయత్నాలు చేస్తున్న ఆయన నేతృత్వంలోని కాంగ్రెస్ గూటికి పాత నేతలు చేరుకుంటారన్న వార్తలు జోరుగా వినబడుతున్నాయి. ఈ నేపథ్యంలో గత కొన్ని రోజులుగా నగరంలోని టీఆర్ఎస్ ఎమ్మెల్యే దానం నాగేందర్ కూడా కాంగ్రెస్ తీర్థం పుచ్చుకునేందుకు రంగం సిద్దమైందన్న వార్తలు వినబడుతున్నాయి. కాగా వీటిపై ఇవాళ ఎమ్మెల్యే దానం నాగేందర్ స్పందించారు.

రేవంత్ రెడ్డి మాటలకు మూతి, తోక ఏది ఉండదని ఎమ్మెల్యే దానం నాగేందర్ విమర్శించారు. ఇక గుంజుకునుడే అంటున్నాడని.. ఇక్కడ గుంజుకోవడానికి ఎవడబ్బ సొమ్ము కాదన్నారు. నేడు ఆయన మీడియాతో మాట్లాడుతూ.. ‘‘ఇక్కడ జరుగుతున్న అభివృద్ధి కనిపించడం లేదా? నా మీద జరుగుతున్న దుష్ప్రచారంపై పోలీసులకు ఫిర్యాదు చేశాను. క్రిమినల్ కేసులు పెట్టాలని కోరాను. తన ప్రాణం ఉన్నంత వరకు టీఆర్ఎస్ లోనే ఉంటానని.. కాంగ్రెస్‌లోకి వెళ్లడానికి ఆ పార్టీలో ఏముంది? కాంగ్రెస్‌లో ఓ వర్గం తనను భాదించినందుకే తాను బయటకు వచ్చానన్నారు. తాను నమ్ముకున్న నేత ఉన్నంత వరకూ ఆ నేత వెంటే ఉంటానని అన్నారు.

కాంగ్రెస్ లో సీనియర్లకు చీము, నెత్తురుంటే బయటకు రావాలని పిలుపునిచ్చారు. పార్టీలోకి నిన్న వచ్చిన రేవంత్ కింద సీనియర్లుగా పనిచేస్తారా? ఆలోచించుకోవాలని సూచించారు. రేవంత్ అదృష్టం బాగుండి వీహెచ్ హాస్పిటల్ లో ఉన్నాడని అన్నారు. లేదంటే ఇప్పటికే దుమ్ము లేచేదన్నారు. తన ఇంటిలోకి గులాభి కండువాలు కప్పుకున్నవారికే అనుమతి వుందని అన్నారు. ఉమ్మడి రాష్ట్రంలో మేము మంత్రులుగా ఉండి ఫెయిల్ అయ్యామని ఆత్మపరిశీలన చేసుకుంటున్నామన్నారు. వైఎస్ కంటే కేసీఆర్ ఎక్కువ అభివృద్ధి చేస్తున్నారు.