ఐదుగురు ఐఏఎస్ అధికారులకు జైలుశిక్ష.. జీతాల్లో కోత: ఏపీ హైకోర్టు

Posted: 09/02/2021 05:02 PM IST

న్యాయస్థానాలు తీర్పులు ఇచ్చి బాధిత మహిళకు పరిహారం అందించాలని పలుమార్లు చెప్పినా.. కోర్టుల తీర్పులను అమలుపర్చకుండా నిర్లక్ష్యంగా వ్యవహరించి.. కోర్టు ధిక్కారానికి పాల్పడిన ఐదుగురు ఐఏఎస్ అధికారులపై హైకోర్టు సంచలన అదేశాలను జారీ చేసింది. కోర్టు ధిక్కారానికి పాల్పడటంపై తీవ్ర ఆగ్రహం వ్యక్తం చేసిన న్యాయస్థానం ఐదురుగు ఐఏఎస్ అధికారులకు జైలు శిక్షతో పాటు వెయ్యి రూపాయల జరిమానా కూడా విధించింది. అంతేకాదు వారి వేతనాల్లో కూడా కోత విధించి పరిహారం చెల్లించాలని కూడా అదేశాలను జారీ చేసింది.

రాష్ట్ర ప్రభుత్వ అదేశాలను అములుపర్చాల్సిన ఐఏఎస్ అధికారులపై న్యాయస్థానం ఇంతలా కన్నెర చేయడానికి వారి నిర్లక్ష్యమే కారణం. అయితే ఈ మేర అదేశాలను జారీ చేసిన న్యాయస్థానం ఆంధ్రప్రదేశ్ రాష్ట్రోన్నత న్యాయస్థానమే కావడం గమనార్హం. ఇక ఐదుగురు ఐఏఎస్ అధికారులు కూడా రాష్ట్రానికి చెందిన వారే కావడంతో ఈ అంశం చర్చనీయాంశంగా మారింది. ఓ మహిళ నుంచి భూమి తీసుకుని పరిహారం అందించని ఐఏఎస్ అధికారులపై న్యాయస్థానం ఈ మేరకు ఆగ్రహం వ్యక్తం చేసింది. కోర్టు ఆదేశించినా పరిహారం చెల్లింపులను ఎందుకు ఆలస్యం చేస్తున్నారంటూ మండిపడిన కోర్టు.. ఐదుగురు ఐఏఎస్ లకు జైలు శిక్ష, జరిమానాను విధించింది.

నెల్లూరు జిల్లా తాళ్లపాకకు చెందిన సాయి బ్రహ్మ అనే మహిళకు సంబంధించిన భూ పరిహారం కేసుపై హైకోర్టు ఈ తీర్పునిచ్చింది. విశ్రాంత ఐఏఎస్ అధికారి మన్మోహన్ సింగ్ కు జైలు శిక్షతో పాటు రూ.వెయ్యి జరిమానాను విధించింది. నాటి నెల్లూరు కలెక్టర్ శేషగిరిబాబుకు రెండు వారాలు, ఐఏఎస్ అధికారి ఎస్.ఎస్. రావత్ కు నెల రోజులు, ముత్యాల రాజుకు రెండు వారాలు, మరొక ఐఏఎస్ కు రెండు వారాల జైలు శిక్షను విధించింది. అందరికీ రూ.వెయ్యి చొప్పున జరిమానా వేసింది. శిక్షపై అప్పీల్ చేసుకునేందుకు నెల రోజుల గడువునిచ్చింది.