ITEMVIDEOS: జత కోసం వెతుకుతూ.. వేగంగా వచ్చిన సముద్రపు పాము

Posted: 09/02/2021 06:21 PM IST

Paddle boarder faces sea snake in the middle of the ocean watch fascinatingly terrifying video

చుట్టూర సముద్రం.. చిన్న పడవలో అలా విహారం చేస్తున్న సముద్ర ఔత్సాహికులు. ఈ క్రమంలో సముద్రంలోని ప్రమాదకర జీవులు వారికి తారసపడితే.. కిమ్మనకుండా ఉంటారు. ఏ మాత్రం అలికిడి చేసినా అవి వారిని గుర్తించి ముప్పు తలపెట్టే ప్రమాదం పోంచివుంటుంది. అయితే ఇలానే వెళ్లిన సముద్ర ఔత్సాహికుడికి ఏకంగా పెద్ద సముద్రపు పాము కనిపించింది. వామ్మో పాము అని దానిని చూస్తూండగానే అది ఎక్కడి నుంచో ఈ నాటు పడవను పసిగట్టంది. దాని వైపే అలా వేగంగా దూసుకువచ్చింది. ఈ స్థానంలో ఎవరైనా వుంటే పడవను దిగలేరు.. అలా అని పాము రాకను చూసి ప్రాణాలు అరచేతిలో పెట్టుకుని ఉండాల్సిందే.

సముద్రంలో పడవ దిగినా.. పాము కాటేసినా ప్రమాదమే. దీంతో భయంతో బిక్కచచ్చిపోవాల్సిన పరిస్థితి ఏర్పడుతోంది. కానీ ఈ సముద్ర ఔత్సాహికుడు.. యూట్యూబర్ మాత్రం తన వెంట పడిన పామును వీడియో తీశాడు. పడవేసుకొని సముద్రంలోకి వెళ్లిన సమయంలో నీటి నుంచి బయటకు వచ్చిన ఈ పాము.. అతని వెంట పడింది. ఎంతలా అంటే పడవ వెళ్తున్న వేగాన్ని చట్టుక్కున అందుకుంది. అలా వేగంగా వచ్చిన పాము పడవలోకి ఎంటర్ అయ్యేందుకు ప్రయత్నించి.. ఒక్క క్షణం ఆ పడవపై తల పెట్టి, ఏదో సంశయంతో తాను వెతుకుతున్నది దీని కోసం కాదు అని వెనుతిరిగి వెళ్లిపోయింది. ఆ తర్వాత నీటిలోపలకు వెళ్లి మాయమైంది.

టిక్ టాక్ లో బ్రాడీ మోస్ అనే అస్ట్రేలియా దేశానికి చెందిన ఫిల్మ్ మేకర్, యూట్యూబర్, సముద్ర ఔత్సాహికుడు షేర్ చేసిన ఈ వీడియో ఇతర సోషల్ మీడియా వేదికలకు కూడా పాకింది. సాధారణంగా నీటి పాములు మనుషుల జోలికి రావని ఈ వీడియోలో బ్రాడీ చెప్పడం వినిపిస్తుంది. కానీ ఏడాదిలో ఈ సమయంలో మాత్రం అవి జత కోసం వెతుకులాడుతూ ఉంటాయట. చాలా చిరాకు పడుతూ ఉండటంతోనే అది తనను వెంబడించిందని బ్రాడీ వివరించాడు. ట్విట్టర్‌లో కూడా ఈ వీడియో బాగా వైరల్ అయింది. ఒళ్లు గగుర్పొడిచే వీడియో చూసిన నెటిజన్ల నుంచి మిశ్రమ స్పందనలు వస్తున్నాయి.