Posted: 06/06/2012 10:20 AM IST

ఇంతకుముందున్న ఎంపి అభివృద్ధి ఏమీ చేశాడో ఏమి చేయలేదో తనకు తెలియదన్నారు. తన గురించి మాత్రమే తాను చెప్పుకుంటూ వెళ్తానని పేర్కొన్నారు. నెల్లూరు సీమను తప్పక పారిశ్రామికాభివృద్ధి చేస్తానని తెలిపారు. నెల్లూరు నగరంలో యువతకు అక్కరకొచ్చేలా క్రికెట్ స్టేడియం నిర్మిస్తానంటూ రాజ్యసభ సభ్యులు, ఉప ఎన్నికల్లో కాంగ్రెస్ పార్టీ అభ్యర్థిగా పోటీ చేస్తున్న తిక్కవరపు సుబ్బరామిరెడ్డి తెలిపారు. నగర పరిధిలో జరిగిన రోడ్‌షో కార్యక్రమాల్లో, విలేఖర్ల సమావేశంలో ఆయన మాట్లాడారు. నెల్లూరులో క్రికెట్ స్టేడియంతోపాటు యువత, రైతులు, అన్ని వర్గాలకు ఉపయోగపడేలా ఎఫ్‌ఎం రేడియో స్టేషన్ స్థాపిస్తానని తెలిపారు. తానెవ్వరినీ రాజకీయంగా విమర్శించనని స్పష్టం చేశారు. సానుకూల దృక్పథంతోనే ముందుకు వెళ్తున్నట్లు వివరించారు. నగరంలో పేరుకుపోయిన డ్రైనేజి సమస్యను పరిష్కరించేందుకు కేంద్ర ప్రభుత్వంతో చర్చించి అవసరమైన నిధులు సాధించుకొస్తానన్నారు. తాను 1989 ఏప్రిల్ 24న అప్పటి ప్రధాని రాజీవ్‌గాంధీ సమక్షంలో కాంగ్రెస్‌లో చేరానని గుర్తు చేసుకున్నారు. కన్ను మూసేంత వరకు ఈ పార్టీలోనే ఉంటానని వెల్లడించారు. తనకు నెల్లూరీయులు ఒక్కసారి అవకాశం ఇచ్చి చూపిస్తే అభివృద్ధి అంటే ఏమిటో చేసి చూపగలనని ధీమా వ్యక్తం చేశారు. ఈ టిఎస్‌ఆర్ ప్రజాస్టార్ అంటూ పేర్కొన్నారు. ఐదేళ్లలో ఏభైవేల కోట్ల రూపాయల విలువైన పరిశ్రమలు తీసుకురావడం ద్వారా యువతకు ఉపాధి అవకాశాల్ని ముమ్మరంగా అందుబాటులోకి తీసుకొస్తానన్నారు.