సంజయ్ దత్ భార్య కోసం 30 రోజులు జైలు బయట

Posted: 12/21/2013 09:09 PM IST

పుణె ఎర్రవాడ జైల్లో ఖైదీగా శిక్షను అనుభవిస్తున్న బాలీవుడ్ నటుడు సంజయ్ దత్ తన భార్య కోసం 30 రోజులు జైలు బయట కాపురం చేస్తున్నాడు. సంజయ్ దత్ జైల్లో ఖైదీగా ఉన్నప్పటికి ఆయనకు జైలు అధికారులు నుండి అనుమతి లభించింది. సంజయ్ దత్ తన భార్య మాన్యతా అనారోగ్యం కారణంగా పెరోల్ పై 30 రోజులు తన స్వగృహంలో ఉండేందుకు ఎర్రవాడ జైలు మంజూరు చేసింది. భార్య మాన్యతా కాలేయ సంబంధిత వ్యాధితో బాధపడుతున్నారని వైద్యులు నిర్థారించారు.

 

ఈ నేపధ్యంలో తన భార్య యోగక్షేమాల దృష్ట్యా తనకు నెలరోజుల పాటు శెలవు ఇవ్వాలని సంజయ్ దత్ అభ్యర్థన చేసుకున్నారు. సంజయ్ భార్య ఆరోగ్యానికి సంబంధించిన రిపోర్టును పరిశీలించిన పిదప జైలు అధికారులు మున్నాభాయ్‌కు 30 రోజులపాటు పెరోల్‌పై అనుమతి ఇచ్చారు. దీంతో పుణె ఎర్రవాడ జైలు నుంచి సంజయ్ ఈరోజు విడుదల కానున్నారు.

 

కాగా ఇంతకుముందు అక్టోబరు నెలలో కూడా సంజయ్ ఇలాగే పెరోల్ పై ఇంట్లో గడిపి వచ్చారు. దీనిపై ఇప్పటికే అభ్యంతరాలు వ్యక్తమయ్యాయి. ఐతే అతడి కుటుంబ పరిస్థితుల దృష్ట్యా తాము అనుమతి ఇచ్చినట్లు జైలు అధికారులు సమర్థించుకున్నారు. కాగా 1993 ముంబై బాంబు పేలుళ్ల కేసుకు సంబంధించి టాడా కోర్టు తీర్పును సుప్రీంకోర్టు సమర్థించడంతో సంజయ్ కారాగార శిక్ష అనుభవిస్తున్నారు. ఇంకా ఆయన మరో 42 నెలలపాటు జైల్లో మగ్గవలసి ఉంది. సంజయ్ దత్ క కష్టాలు ఒకేసారి కౌగిలించుకుంటున్నాయి. అయితే కష్టాల కౌగిలి నుండి సంజయ్ దత్ త్వరగా బయట పడాలని .. ఆయన అభిమానులు కోరుకుంటున్నారు.