చక్కని కథలు అల్లుతున్న బాబు : జగన్

Posted: 03/24/2015 01:32 PM IST

Ys jagan mohan reddy fires on ap cm chandrababu naidu

వైఎస్సార్ కాంగ్రెస్ అధ్యక్షుడు వైఎస్ జగన్ మోహన్ రెడ్డి మరోసారి ఏపీ సీఎం చంద్రబాబు నాయుడుపై మండిపడ్డారు. విద్యుత్ ఛార్జీల పెంపుపై అసెంబ్లీలో బాబు చేసిన ప్రకటనపై జగన్ స్పందించారు. చంద్రబాబు అబద్ధాలతో ప్రజలకు చక్కని కథ చెప్పారంటూ ఆయన ఎద్దేవా చేశారు. పీపీఏలు చేసుకోవడానికి ప్రజలపై భారం మోపుతున్నారని ఆయన ఆరోపించారు.

అప్పట్లో ఛార్జీలు పెంచితే ప్రజలను తిరగబడమని పిలుపునిచ్చిన చంద్రబాబు.. ఇప్పుడు అందుకు విరుద్ధంగా వ్యవహరించారని ఆయన అన్నారు. ఎన్నికల సందర్భంగా విద్యుత్ ఛార్జీలు తగ్గిస్తామని ప్రజలకు హామీ ఇచ్చిన బాబు.. ఇప్పుడు దాన్ని ఆచరణలో పెట్టుకోలేకపోయారని ఆయన తెలిపారు. విద్యుత్ ఛార్జీలు పెంచడానికి ఎలాంటి హేతుబద్ధత లేదని.. పెంపు నిర్ణయాన్ని తాము వ్యతిరేస్తున్నామని జగన్ తేల్చి చెప్పారు.

ఈ క్రమంలోనే.. వైఎస్ పాలనలో బాబు 8 సార్లు విద్యుత్ ఛార్జీలు పెంచారని తెలిపారు కానీ.. అప్పుడు ఒక్క రూపాయి కూడా పెంచలేదని ఆయన చెప్పుకొచ్చారు. విద్యుత్ అంశంలో వైఎస్ పాలనలో అద్భుతమైన క్రిసిల్ రేటింగ్ వచ్చిందని, కానీ బాబు తన ప్రసంగంలో ఆ విషయమే ప్రస్తావించలేదని ఆయన అన్నారు. తాను చెప్పిన లెక్కలు తప్పని తేలితే బాబు పదవికి రాజీనామా చేస్తారా? అని సవాల్ విసిరారు.

ఇక కిరణ్ పాలన గురించి జగన్ మాట్లాడుతూ.. కిరణ్ పాలన కారణంగా వేలకోట్ల భారం పడిందంటున్న బాబు.. అదే కిరణ్ ప్రభుత్వాన్ని ఎందుకు కాపాడారో చెప్పాలని డిమాండ్ చేశారు. ఆనాడు విప్ జారీ చేయకపోతే.. కిరణ్ సర్కార్ వుండేదే కానీ, రాష్ట్ర విభజన అస్సలు జరిగేదే కాదని ఆయన దుయ్యబట్టారు.