ఆయన వెళ్తే.. మీకెందుకు భయం : రోజా

Posted: 04/01/2015 06:33 PM IST

వైఎస్సార్ కాంగ్రెస్, టీడీపీ పార్టీ మధ్య నిత్యం ఏదో వివాదం చెలరేగుతూనే వుంటుందన్న విషయం తెలిసిందే! టీడీపీ తరఫున ఏమైనా నిర్ణయాలు తీసుకుంటే దాన్ని వైకాపా తప్పుపట్టడం... అదే వైకాపాలో ఎవరైనా ఏదైనా చేస్తే దానిపై టీడీపీ వక్రీకరించడం లాంటివి జరుగుతూనే వున్నాయి. మొన్నీమధ్యే అసెంబ్లీలో ఈ రెండు పార్టీల మధ్య భీకరమైన మాటలయుద్ధం కూడా జరిగిన విషయం అందరికీ విదితమే! మొత్తానికి చెప్పాలంటే.. ఈ రెండు పార్టీల మధ్య పచ్చిగడ్డి వేస్తే భగ్గుమనేంత శతృత్వం వుంది. ఇక నగరి వైకాపా ఎమ్మెల్యే, నటి రోజాకి, టీడీపీకి మధ్య గతకొన్నాళ్ల నుంచి మాటలపోరు జరుగుతూ వస్తోంది. తాజాగా మరోసారి ఆమె మరోసారి టీడీపీ మీద ధ్వజమెత్తారు.

తమ పార్టీ నేత వైఎస్ జగన్ మోహన్ రెడ్డి ఏం చేసినా దాన్ని టీడీపీ నేతలు వక్రీకరిస్తున్నారంటూ రోజా మండిపడ్డారు. వైఎస్ జగన్ ఢిల్లీకెళ్లి ప్రధాని మోదీతో కలిసొచ్చిన సంగతి తెలిసిందే! జగన్ ఢిల్లీ పర్యటనపై టీడీపీ నేతలు తమ వాదనలు వినిపించారు. వారు చేసిన వ్యాఖ్యలపై మండిపడ్డ రోజా.. తీవ్ర స్థాయిలో ఆగ్రహం వ్యక్తం చేశారు. ‘వైఎస్ జగన్ ఢిల్లీకి వెళితే మీకెందుకు భయం?’ అంటూ ఆమె ప్రశ్నించారు. జగన్ కేంద్రం పెద్దలను కలిస్తే పట్టిసీమ బండారం వెల్లడవుతుందని టీడీపీ నేతలు భయపడుతున్నారని, అందుకే వాళ్లు ఈ పర్యటనను వక్రీకరిస్తూ జగన్ ను విమర్శిస్తున్నారని ఆమె ఎద్దేవా చేశారు. అసలు పట్టిసీమ రాయలసీమకు మేలు చేకూర్చది కాదని.. కేవలం బాబు, లోకేష్ లకు మాత్రమే ఉపయోపడుతుందని ఆమె వ్యంగ్యంగా వ్యాఖ్యానించారు.

ఇక యనమల రామకృష్ణ మీద విమర్శలు గుప్పించిన రోజా.. అసలు ఆయన మంత్రి ఎలా అయ్యారో అందరికీ తెలుసునని అన్నారు. అలాంటి వ్యక్తి జగన్ ను విమర్శించడం ఆశ్చర్యం కలిగిస్తోందని ఆమె అభిప్రాయపడ్డారు. రాష్ట్రంలో ప్రతిపక్ష నేతగా వున్న జగన్.. ప్రజల సమలస్యలపై ప్రధాని మోదీని కలవడం తప్పా..? అని రోజా టీడీపీ నేతలను అడిగారు. మరి.. దీనిపై టీడీపీ ఏ విధంగా స్పందిస్తుందో వేచి చూడాల్సిందే!