మహిళలు వింతగా తయారవుతున్నారు : మంత్రి భార్య

Posted: 04/06/2015 01:39 PM IST

గోవా మంత్రి దీపక్ ధవలికర్ సతీమణి లత తాజాగా సంచలన వ్యాఖ్యలు చేసి వివాదంలో చిక్కుకున్నారు. పాశ్చాత్య సంస్కృతికి అలవాటు పడుతున్న మహిళలు చాలా వింతగా, విచిత్రంగా తయారవుతున్నారని ఆమె అన్నారు. పాశ్చాత్య సంస్కృతిని అవలంభించడం వల్లే అత్యాచారాలు పెరగుతున్నాయని, అందుకు దూరంగా ఉండాలని ఆమె ఉచిత సలహాయిచ్చారు. వివాదస్పద సనాతన్ సంస్థలో పనిచేస్తున్న ఆమె మార్గావ్ లో ఆదివారం జరిగిన సభలో ఈ వ్యాఖ్యలు చేశారు.

ఈ నేపథ్యంలోనే ఆమె మాట్లాడుతూ...
* పిల్లలను కాన్వెంట్ స్కూల్స్ కు పంపించొద్దని, ఫోన్ లో 'హలో' కు బదులుగా నమస్కారం అనాలని లత సలహాయిచ్చారు. మన సంస్కృతిని కాపాడాల్సిన సమయం ఆసన్నమైందన్నారు.
* హిందూ పురుషులు బయటకు వెళ్లేటప్పుడు విధిగా తిలకం పెట్టుకోవాలని, మహిళలు కుంకుమ్ పెట్టుకోవాలని సూచించారు.
* జనవరి ఫస్ట్ కాకుండా ‘గుడి పడ్వా’ను నూతన సంవత్సరంగా జరుపుకోవాలని అన్నారు.
* అత్యాచారాలు పెరగడానికి కారణమవుతున్న పాశ్చాత్య సంస్కృతిని అనుకరిస్తూ భారత మహిళలు వింతగా తయారవుతున్నారని మండిపడ్డారు.
* నుదుటిన కుంకుమ పెట్టుకోవడం మానేశారని ఆవేదన వ్యక్తం చేశారు.
* శరీర కొలతలు కొట్టొచ్చినట్టు కనబడేలా బిగుతు బట్టలేసుకుంటున్నారని, జడలు వేసుకోవడం మానేసి జుత్తును కత్తిరించుకుంటున్నారని ఆగ్రహం వ్యక్తం చేశారు.

ఈమె ఈ విధంగా వ్యాఖ్యలు చేయడంపై కాంగ్రెస్ పార్టీ తీవ్రంగా విమర్శించింది. మతం ప్రాతిపదికన రాష్ట్రాన్ని విడగొట్టే కుట్రలో భాగంగా ఈ వ్యాఖ్యలు చేశారని ఆరోపించింది. మరోవైపు మహిళాసంఘాలు కూడా ఈమె మీద ఆగ్రహం వ్యక్తం చేస్తున్నట్లు తెలుస్తోంది. అటు తన భార్య చేసిన వ్యాఖ్యలపై స్పందించేందుకు దీపక్ ధవలికర్ నిరాకరించారు.