అమ్మకు బెయిల్ వచ్చింది.. ఇప్పడేమంటారు..?

Posted: 10/17/2014 01:55 PM IST

Ycp leaders anticipating tdp responce on sc granting bail to jayalalithaa in assets case

తమిళనాడు మాజీ ముఖ్యమంత్రి, అన్నాడిఎంకే అధినేత్రి జయలలితకు దేశ సర్వోన్నత న్యాయస్థానం బెయిల్ మంజూరు చేయడంపై రాష్ట్ర రాజకీయాల్లో చర్చనీయాంశంగా మారింది. ఆదాయానికి మించిన ఆస్తుల కేసులో జయలలితకు 66 కోట్ల రూపాయలకే నాలుగేళ్ల జైలు, 100 కోట్ల రూపాయల జరిమానా విధించడంపై టీడీపీ నేతలు ప్రతిపక్ష నేత, వైసీపీ అధినేత జగన్ ను టార్గెట్ చేశారు. జయలలితకు నాలుగేళ్లయితే.. మీకు నలబై ఏళ్లు తప్పదంటూ జగన్ పై సెటైర్లు వేశారు. గత నెల 27న జయలలిత జైలుకెళ్లిన మరుక్షణం నుంచి హుదూద్ తుపాను విలయం సృష్టించే వరకు టీడీపీ నేతలకు, మంత్రులకు జగన్ లక్ష్యంగా విమర్శలు గుప్పించడమే పనిగా మారింది.

తమ పనేదో తాము చూసుకుంటారు అని ముద్రపడిన మంత్రులు కూడా జగన్ ను టార్గెట్ చేసి వెల కోట్ల రూపాయల జరిమానా.. ఏళ్ల పాటు జైలు తప్పదని విమర్శలు గుప్పించారు. కర్ణాటక హైకోర్టు జయలలిత బెయిల్ ను తిరస్కరించిన సమయంలో.. అధికార పక్ష టీడీపీతో పాటు స్వంత పార్టీ వైసీపీలోనూ అందోళన మొదలైంది. జయలలితకు బెయిల్ రాలేదు.. మరి అక్రమాస్థుల కేసులో జగన్ జైలుకు వెళ్లాల్సి వస్తే.. బెయిల్ ఎలా వస్తుందన్న దిగులు పార్టీ నేతల్లో ప్రారంభమైంది. న్యాయశాస్త్ర కోవిదుడు, తల పండిన మేధావైన రాంజఠ్మాలనీ వంటి న్యాయవాదితోనే పని జరగలేదంటే.. ఇక జయకు బెయిల్ రాదని అన్నా డీఎంకే పార్టీ నేతలు, ఇటు తమ పరిస్థితిని తలచుకుని వైసీపీ నేతలు తలపట్టుకున్నారు.

ఆ సమయంలోనే జగనన్న వదిలిన బాణం, రాజన్న కూతరు షర్మిలను తెలంగాణ పార్టీ వ్యవహారాల అధ్యక్షురాలిగా జగన్ నియమించారని కూడా వార్తలు వచ్చాయి. తన కేసుల విచారణకు వచ్చి.. జైలుకెళ్లాల్సిన పరిస్థితులు వస్తే..ఆంధ్రప్రదేశ్ లో తన తల్లి విజయమ్మ, తెలంగాణలో సోదరి షర్మిల పార్టీని నడుపుతారన్న నమ్మకంతోనే జగన్ వారిని నియమించారని పుకార్లు షికార్లు చేశాయి.

మరి ఇప్పడు జయలలితకు బెయిల్ లభించింది. అది కూడా దేశ సర్వోన్నత న్యాయస్థానం సుప్రీంకోర్టులోనే. సాధారణ షరతులతో కూడిన బెయిల్ ను జయలలితకు అత్యున్నత కోర్టు మంజూరు చేసింది. దీనిపై ఇప్పడు అధికార పార్టీ నేతలు ఎలా స్పందిస్తారు. జయలలితకు బెయిల్ వచ్చింది.. మీకు వస్తుంది అంటూ జగన్ ను టార్గెట్ చేస్తారా..? లేక జయమ్మ వచ్చింది కానీ.. మీకు మాత్రం రాదు అంటారా..? అక్రమాస్థుల కేసులో 2013లో వచ్చిన ఉప ఎన్నికలకు ముందు మే 27న రిమాండ్ ఖైదీగా జైలుకెళ్లిన జగన్ ఆ తరువాత 16 మాసాలకు సెప్టెంబర్ 24న జైలు నుండి బయటకు వచ్చారు. విచారణ జరిగిన తరువాత కూడా జయలలిత తరహాలో బయటకు వస్తారని వైసీపీ కార్యకర్తలు ధమా వ్యక్తం చేస్తున్నాయి

జి.మనోహర్