ఆంధ్రప్రదేశ్ గవర్నర్ గా కిరణ్ బేడీ.?

Posted: 01/22/2019 05:20 PM IST

ఆంధ్రప్రదేశ్ రాష్ట్రానికి కొత్త గవర్నర్ వస్తున్నారన్న వార్త రాజకీయవర్గాలో మరోమారు సంచలనంగా మారింది. ప్రస్తుతం ఉమ్మడి తెలుగురాష్ట్రాలకు గవర్నర్ గా వున్న ఈఎస్ఎల్ నరసింహన్ దాదాపుగా తొమ్మిదేళ్లకు పైగా పదవిలో కొనసాగుతున్న నేపథ్యంలో కేంద్రం ఈ దిశగా నిర్ణయం తీసుకోనుందని తెలుస్తుంది. అయితే ఏపీకి ఐరన్ లేడీ కిరణ్ బేడీ రాబోతున్నారనే వార్తలు ప్రస్తుతం హల్ చల్ చేస్తున్నాయి. కిరణ్ బేడీని నియమించటంలో రాజకీయ కోణం వుందనే రాజకీయ విశ్లేషకులు భావిస్తున్నారు.

రాష్ట్ర విభజన అనంతరం రెండు రాష్ట్రాల మధ్య వున్న పలు అపరిష్కృత సమస్యలకు పరిష్కారం చూపేందుకుగాను రెండు పర్యాయాలు కేంద్రం నరసింహన్ ను ఉమ్మడి రాష్ట్రాల గవర్నర్ గా కొనసాగించింది. అయితే ప్రస్తుతం మాత్రం ఆయనను కేవలం తెలంగాణకు పరిమితం చేసి.. పుదుచ్చేరి లెఫ్టినెంట్ గవర్నర్‌గా వ్యవహరిస్తున్న కిరణ్ బేడీని ఏపీ గవర్నర్ గా నియమించనున్నట్లు ప్రచారం జరుగుతుంది.

ఏపీలో అసెంబ్లీ ఎన్నికలకు సమయం దగ్గర పడుతుండటంతో... గవర్నర్ నియామకంపై కేంద్రం దృష్టిసారించింది. ఆంధ్రప్రదేశ్ ముఖ్యమంత్రి చంద్రబాబు జాతీయ రాజకీయాలపై దృష్టిసారిస్తూ, కేంద్రాన్ని ఇరుకున పెట్టాలని ప్రయత్నాలు సాగిస్తున్న క్రమంలో.. ఆయనకు చెక్ పెట్టేందుకు ఇప్పటికే రాష్ట్ర ప్రధాన ఎన్నికల అధికారిగా ద్వివేదీ నియామకం జరగ్గా... ఇప్పుడు గవర్నర్ నియామకంపై కేంద్రం వ్యూహాత్మకంగా వ్యవహరిస్తున్నట్లు కనిపిస్తోంది.
 
పుదుచ్చేరిలో కాంగ్రెస్ ప్రభుత్వానికీ కిరణ్ బేడీకి మధ్య సరైన సఖ్యత లేదు. అమె కేంద్రం చేతిలో కీలుబొమ్మలా పనిచేస్తున్నారని.. కాంగ్రెస్ అరోపణలు సంధించగా, తనపై చేస్తున్న ఆరోపణలు అవాస్తవం, కుట్రపూరితం, ఆధారరహితం, అర్థరహితం అని అమె మండిపడ్డారు. తన రెండున్నర ఏళ్ల సర్వీసులో పుదుచ్చేరిలో ఒక్కటంటే ఒక్కటి కూడా తప్పు చెయ్యలేదని అన్నారు. కాగా, మాజీ ఐపీఎస్ ఆధికారిగా కిరణ్ బేడీకి గుర్తింపు ఉంది. ఆమెను ఏపీ గవర్నర్‌గా నియమిస్తే, ఇది రాజకీయ క్షక్షసాధింపు చర్యగానే టీడీపీ పేర్కొనవచ్చు.