వైసీపీలోకి ఉండవల్లి.. మంత్రిపదవి కన్ఫార్మ్..?

Posted: 05/07/2019 04:32 PM IST

Undavalli arun kumar assured of cabinet birth in ysrcp

ఆంధ్రప్రదేశ్ రాజకీయ సమీకరణాలు రోజురోజుకు మారిపోతున్నాయి. ఎప్పుడు ఎలాంటి మార్పులు చోటుచేసుకుంటాయో? అన్న విషయం ఎవరికి అంతుపట్టడం లేదు. ఈ నెల 23 వరకు ఈ ఉత్కంఠ సర్వత్రా నెలకొంటున్నప్పటికీ.. అధికార పగ్గాలను ఎవరు చేపడతారన్న విషయంలో మాత్రం సస్పెన్స్ అదే రోజున వీడనుంది. వైసీపీ అధినేతకు అవకాశాలు ఎక్కువగా వున్నాయని సర్వేలు స్పష్టం చేస్తున్నాయి. ఈ నేపథ్యంలో కాంగ్రెస్ పార్టీ సీనియర్ నేత అయిన ఉండవల్లి అరుణ్ కుమార్ ‌కూడా వైసీపీలోకి చేరిపోతున్నారా ? అన్న ప్రచారం రాజకీయవర్గాల్లో జోరుగా సాగుతోంది.

జగన్ ఉండవల్లిని వైసీపీలోకి రావాలని ఆహ్వానించారా? అంటే.. అవుననే సమాధానాలే వస్తున్నాయి. ఎందుకంటే ఉండవల్లి అరుణ కుమార్ రాజకీయాల్లో తలపండిన నేత. అన్ని విషయాలపై స్పష్టమైన అవగాహన ఉన్న నాయకుడు. అవగాహన లేకున్నా ఆ అంశాలపై అధ్యయనం చేసి మరీ పూర్తి సమాచారంతో చర్చించే నేత. ఇక దీనితో పాటు జగన్ తండ్రి వైఎస్ రాజశేఖర్ రెడ్డికి ఎంతో ఆప్తుడు. ఎలాంటి విషయమైనా ముక్కు సూటిగా మొహమోటం లేకుండా చెప్పేస్తారు ఉండవల్లి. అనేక రాజకీయ విశ్లేషణలు కూడా చేస్తుంటారు. ప్రత్యర్థుల్ని ఎదుర్కోవడంలో ఆయనను మించిన వారు ఉండరు.

రాష్ట్ర విభజనతో రాజకీయాలకు దూరంగా వున్న ఉండవల్లి మళ్లీ క్రియాశీలక రాజకీయాలలోకి అడుగుపెడుతున్నారా.? ఆయన అనుభవాలను, అవగాహనను వినియోగించుకుని ముందుకు సాగేందుకు జగన్ ప్రయత్నిస్తున్నారా.? అంటే ఔనన్న సంకేతాలే వినిపిస్తున్నాయి. ఆ మధ్య జనసేన పార్టీ చీఫ్ పవన్ కల్యాణ్ విభజన హామీలపై చేసిన ఫ్యాక్ట్ ఫైండింగ్ కమిటీలో ఉండవల్లి కూడా ఉన్నారు. అప్పట్లో ప్రెస్ మీట్‌లు హడావుడి చేసిన ఆయన మళ్లీ గప్ చుప్ అయిపోయారు. దీంతో పవన్ కు ఉండవల్లి చేరువైతే.. అది తమ పార్టీకి నష్టమని భావించిన వైసీపీ.. ఆయనను మంత్రిపదవి హామీని ఇచ్చి మౌనంగా వుంచిందని కూడా రాజకీయవర్గాల్లో గుసగుసలు వినిపిస్తున్నాయి.

జగన్ పట్ల ఆయన పార్టీ పట్ల పెద్ద సానుకూలత చూపించకపోయినా.. వ్యతిరేకతను కూడా ఎన్నడూ ప్రదర్శించని ఉండవల్లిని వైసీపీ తమ అకర్ష్ పథకంలో అకట్టుకుందని సమాచారం. ఉండవల్లి లాంటి సీనియర్ నేతలు ఉంటే పార్టీకి కూడా ఎంతో మేలు జరుగుతుందని జగన్ భావిస్తున్నారని తెలుస్తోంది. అందుకే తమ పార్టీ అధికారంలోకి వస్తే తన మంత్రివర్గంలో చేరాలని జగన్ ఉండవల్లిని ఆహ్వానించినట్లు తెలుస్తోంది. జగన్ ఆహ్వానానికి అటు ఉండవల్లి కూడా సూత్రప్రాయంగా ఓకే అన్నట్లు సమాచారం. అంతేకాదు.. ప్రతిపక్ష పార్టీలను ఆయనే ధీటుగా ఎదుర్కోంటారని కూడా భావించి ఈ నిర్ణయానికి వచ్చినట్టు సమాచారం.