పవన్ కల్యాణ్ ను కట్టడి చేసేందుకు వైసీపీ మేధోమధనం.?

Posted: 11/16/2019 09:38 PM IST

ఆంధ్రప్రదేశ్ అధికార వైసీపీ పార్టీకి ప్రధాన ప్రతిపక్ష పార్టీ టీడీపీ నుంచి కన్నా జనసేన నుంచే ఎక్కువగా విమర్శలు ఎదురవుతున్నాయి. పైపైన వాటిని తమ నేతల ప్రతివిమర్శలతో కౌంటర్ ఇప్పిస్తూన్నా.. లోలోన మాత్రం జనసేనను ఢీకొట్టేందుకు గట్టి వ్యూహ ప్రతివ్యూహాలు రచించాలని ప్రయత్నాల్లో ఆ పార్టీ శ్రేణులు మునిగారని తెలుస్తోంది. అయితే అవినీతి, కులం, మతం. ప్రాంతం లాంటి భేషజాలు తనకు లేవని చాటుతున్న జనసేన అధినేత పవన్ కల్యాణ్ పై అవే టార్గెట్ గా ఎంచుకుని.. తాజాగా పవన్ నాయుడు అంటూ కూడా విమర్శలు చేస్తున్నా.. వాటిని ప్రజలు విశ్వసిస్తారా..? అన్న ప్రశ్నలు ఉత్పన్నమవుతున్నాయి.

ఈ తరుణంలో పవన్ కల్యాణ్ పై విమర్శలతో తమను తాము సంతృప్తి పర్చుకోవడం కన్నా.. వాటిని ఎంత బలంగా తమ మీడియా చేత రాయించినా.. పవన్ కల్యాణ్ కు అంతకుముందు నుంచి వస్తున్న ఇమేజ్ ను డ్యామేజ్ చేయలేమని వైసీపీ నేతలకు అర్థమైంది. అయితే పది మార్లు పది మందితో అదే ప్రచారం చేయిస్తే.. అబద్దం కూడా నిజమవుతుందని అధికార పక్షం ఫీలింగ్ లా వుంది. ఇది అందరి నాయకులు విషయంలో రైటు అవుతుందేమో కానీ పవన్ విషయంలో మాత్రం మిస్ ఫైర్ అవ్వక తప్పదు.

ఎందుకుంటే.. జనసేనాని ఒక్కసారి మీడియా ముందుకు వచ్చి తనదైన శైలిలో క్రిస్టల్ క్లియర్ గా క్లారిటీ ఇస్తే అప్పటి వరకు ఎదుటి వారు నిర్మించిన అబద్దపు సామ్రాజ్యపు గోడలన్ని పేక మేడల్లా పెకిలించబడతాయన్నది అక్షర సత్యం. ఇంతక్లారిటీగా చెప్పడం వెనుకు ఆయన నిజమైన శైలి కనబడుతోంది. కులం ఓట్ల కోసమే.. మతం మతలబుల కోసమో తాను రాజకీయాలు చేయనని ఆయన ఇప్పటికే పలు పర్యాయాలు స్పష్టమైన వైఖరిని ప్రకటించారు. అయినా పవన్ కల్యాన్ ను ఉద్దేశించి వైసీపీ నేతలు పవన్ నాయుడు అంటూ టీడీపీతో అంటకాగుతున్నారని విమర్శలు చేయడం మాత్రం మానడం లేదు.

ఇక వైసీపీ పార్టీ వ్యవస్థాపకుడు, ముఖ్యమంత్రి వైఎస్ జగన్ ను టార్గెట్ చేస్తూ విమర్శలు వస్తే.. అందుకు వైసీపీ నేతలు విమర్శలను గుప్పించడం పరిపాటిగా వస్తోంది. కానీ జనసేన అధినేతపై వచ్చే విమర్శలకు నేరుగా ఆయనే సమాధానం ఇవ్వడం.. అక్కడితో సమస్యను పరిష్కరించే విధంగా వుంటుంది. ఈ క్రమంలో ఇప్పటికే పవన్ కల్యాన్ వైసీపీ నేతలను వార్నింగ్ కూడా ఇచ్చారు. తాజాగా ముఖ్యమంత్రి వైఎస్ జగన్ కు కూడా ఘాటుగా ప్రతిసవాల్ విసిరారు. తనపై వ్యక్తిగత దూషణలకు దిగితే.. తాను దిగుతానని, కొంత స్థాయి.. సంయమనం పాటిస్తే మంచిదని కూడా సూచించారు.

పవన్ కల్యాణ్ వ్యాఖ్యలతో సెల్ప్ గోల్ చేసుకున్న వైసీపీ ఆయనను ఎలా ఢీ కొట్టాలన్న యోచనలో వుంది. పవన్ పై తన మంత్రులు, పార్టీ ముఖ్యనేతలతో విమర్శలు చేయిస్తూనే.. పైపైన గాంభీర్యం ప్రదర్శిస్తూనే.. లోలోన మాత్రం పవన్ కల్యాణ్ ఎలా ఎదుర్కోవాలా.? అన్న అంశాలపై పార్టీ మేధోవర్గం మధనం చేస్తున్నట్లు తెలుస్తోంది. పవన్ కల్యాణ్ మంచి వ్యక్తి అని, ఆయన ఔదార్యం. గుణం, గోప్పదనం గురించి ఇప్పటికే రాష్ట్రమంతా అభిమానులు చాటుతున్నారు. ఇక దానికి తోడు ఆయన చేస్తున్న గుప్తదానాలు.. ఎందరికో జీవితాన్ని కూడా ఇచ్చాయన్న కథనాలు.. ఆయనపై రాజకీయ పార్టీలు వేసే విమర్శలను బదులిస్తూనే వుంటాయి. ఈ క్రమంలో అధికార పక్ష మేధోమథనం ఎంతమేరకు పవన్ ను కట్టడి చేసేందుకు దోహదపడుతుందో వేచి చూడాల్సిందే.!