వేసవిలో చర్మసౌందర్యానికి ఆరెంజ్-పెరుగు ఫేస్ ప్యాక్

Posted: 04/02/2015 06:35 PM IST

వేసవికాలం వచ్చిందంటే చాలు.. చర్మసౌందర్యానికి సంబంధించి ఎన్నో సమస్యల్ని ఎదుర్కోవలసి వస్తుంది. ఈ కాలంలో సూర్యతాపం ఎక్కువగా వుండటం వల్ల ఏ పని చేయకపోయినప్పటికీ శరీరం నుంచి చెమట విసర్జిస్తూనే వుంటుంది. పైగా వాతావరణ కాలుష్యం, దుమ్ము, ధూళి వంటివి చర్మరంధ్రాల్లో చేరిపోవడంతో... చర్మం పొడిబారినట్లుగా కనిపిస్తుంది. ఇక ఈ దెబ్బతో మొటిమలు, నల్లని ఛాయలు, ఇంకా ఇతరత్ర చర్మసమస్యలు వస్తూనే వుంటాయి. బ్యూటీ ప్రోడక్ట్స్ వాడినప్పటికీ అంతగా ఫలితం వుండదు.

అయితే.. ఇటువంటి పరిస్థితుల్లో ఈ చర్మసమస్యల్ని అధిగమించేందుకు కొన్ని చిట్కాలు వున్నాయి. కేవలం బ్యూటీ ప్రోడక్ట్స్ ని మాత్రమే నమ్ముకోకుండా చర్మానికి పోషకాలు అందించే పదార్థాలతో రెమెడీస్ చేసుకుని, చర్మానికి పట్టిస్తే ఫలితం గమనించవచ్చు. ఇలాంటి రెమెడీలు చాలా వున్నాయి. అందులో ఆరెంజ్-పెరుగు ఫేస్ ప్యాక్ ఒకటి! ఈ ప్యాక్ ను ఈ వేసవిలో ట్రై చేస్తే.. మెరిసే సౌందర్యాన్ని పొందవచ్చు. అలాగే దీనిని ఫేస్ స్ర్కబ్ గా ఉపయోగించుకోవచ్చు. ఈ ప్యాక్ పట్టిస్తే.. మొటిమలు, బ్లాక్ స్పాట్స్ తొలగిపోవడంతోపాటు మృదువైన చర్మం పొందవచ్చు. మరి ఈ ప్యాక్ ని ఎలా చేస్తారో తెలుసుకుందామా...

ఆరెంజ్-పెరుగు ఫేస్ ప్యాక్ తయారీవిధానం :

- ముందుగా నారింజ నుంచి తొక్కలని విడదీసి.. వాటిని ఎండలో బాగా ఎండబెట్టాలి. ఇలా కొన్ని రోజులు చేసిన తర్వాత ఎండిన నారింజ తొక్కలను దంచి, పౌడర్ లాగా చేసి పెట్టుకోవాలి. ఈ విధంగా తయారుచేసిన ఈ పౌడర్ లో కాస్త (అర టీ స్పూన్) ఒక పాత్రలో తీసుకోవాలి. అందులో ఒక టీ స్పూన్ పెరుగు వేసి బాగా కలియబెట్టాలి. ఈ మిశ్రమాన్ని ముఖానికి పట్టించి.. ఆరిపోయేంతవరకు అలాగే వుంచుకోవాలి. అనంతరం గోరువెచ్చని నీటితో శుభ్రం చేసుకోవాలి. ఇలా ప్రతిరోజూ చేస్తే.. మెరుగైన సౌందర్యం పొందవచ్చు.

- మొటిమలు ఎక్కువగా వున్నవారైతే.. ఈ ఆరెంజ్-పెరుగు ఫేస్ ప్యాక్ లో కొన్ని చుక్కలు నిమ్మరసం కలుపుకోవాలి. బాగా కలియబెట్టిన అనంతరం ఈ మిశ్రమాన్ని ఈ మిశ్రమాన్ని ఫేస్ కి వేసుకోవాలి. ఇలా వేసుకున్న తర్వాత 15 నిమిషాలపాటు అలాగే వుంచుకోవాలి. బాగా ఆరిన అనంతరం చల్లని నీటితో శుభ్రం చేసుకోవాలి. ఇలా ప్రతిరోజూ ఈ ఫేస్ ప్యాక్ పట్టిస్తే.. మొటిమలు దూరమవడంతోపాటు మెరిసే చర్మ సౌందర్యాన్ని పొందవచ్చు.