పొడిబారిన చేతులు మృదువుగా మారాలంటే..

Posted: 05/16/2015 07:11 PM IST

ఉదయం లేచిన క్షణం నుంచి రాత్రి నిద్రపోయేవరకు మహిళలు వివిధ కార్యకలాపాలు నిర్వహిస్తుంటారు. తీరక సమయం లేకుండా తమ చేతులకు పని చెబుతుంటారు. ఆఫీసులో కీ బోర్డును దంచికొట్టడం కంటే.. ఇంట్లో చేసే పనుల వల్ల చేతులకు గాయాలవుతుంటాయి. ముఖ్యంగా వంటింట్లో ఏదైనా వంటకం చేస్తున్నప్పుడు.. అప్పుడు ఆ వేడి నుంచి వెలువడే ఆవిరి వారి చేతులపై ఎక్కువ ప్రభావం చూపుతాయి. దీంతో మృదువుగా వున్న వారి చేతులు కాలక్రమంలో పొడిబారిపోతాయి. ఇక వేసవికాలంలో ఎండతాపం వల్ల, చలికాలంలో అధిక చల్లదనంతోనూ చేతులు పొడిగా మారుతాయి. అలాంటప్పుడు వాటిని తిరిగి మృదువుగా మార్చుకోవాలంటే.. కొన్ని సింపుల్ టిప్స్ అందుబాటులో వున్నాయి.

చేతుల్లో ముడతలు తగ్గించి, పొడిబారితనం నుంచి ఉపశమనం పొంది మృదువుగా తయారు చేసుకోవాలంటే.. రాత్రిళ్లు మాయిశ్చరైజ్ చేసుకోవాలని బ్యూటీషియన్స్ చెబుతున్నారు. సాధారణ బ్యూటీ ప్రోడక్ట్స్ కంటే ఇంట్లోనే కొన్ని రెమెడీలు తయారుచేసుకుని వాటిని చేతులకు పట్టిస్తే.. మంచి ఫలితం పొందవచ్చునని వారు చెబుతున్నారు. ఎందుకంటే.. సహజ పదార్థాలతో తయారయ్యే రెమెడీలు పోషక విలువలు అత్యధిక మోతాదులో వుంటాయని.. అవి నేరుగా చర్మం మీద ప్రభావం చూపడంతో పొడిగా వున్న చేతులు మృదువుగా మారుతాయని అంటున్నారు. మరి.. చేతులను మృదువుగా మార్చే ఆ హోమ్ రెమెడీస్ ఏంటో తెలుసుకుందామా..

* ఒక పాత్ర తీసుకుని అందులో కొద్దిగా సెనగపిండి, కాస్త పాలు, నిమ్మరసం వేసి.. బాగా కలియబెట్టాలి. ఈ మిశ్రమాన్ని పేస్టులా తయారుచేసుకుని.. దాన్ని చేతులకు పూతలా రాయాలి. బాగా ఆరేంతవరకు అలాగే వుంచుకోవాలి. ఆరిన అనంతరం గోరువెచ్చని నీళ్లతో శుభ్రంగా కడిగేసుకోవాలి. అంతే! ఇలా ప్రతిరోజూ చేసుకుంటే.. చేతుల్లో చేరిన మృతకణాలు తొలగిపోగి, మృదువుగా తయారవుతాయి.

* ఒక గిన్నె తీసుకుని అందులో చెంచా గ్లిజరిన్‌ పోయాలి. అనంతరం అందులో అరచెంచా నిమ్మరసం, కొద్దిగా గులాబీ నీరూ వేసి బాగా కలియబెట్టాలి. పేస్టులా తయారైన ఈ మిశ్రమాన్ని చేతులకు రాసుకోవాలి. ఈ పూత బాగా ఆరిన తర్వాత నీటితో శుభ్రం చేసుకోవాలి. ఇలా ప్రతిరోజూ సాయంత్రం వేళల్లో చేసుకుంటే.. చేతులు పొడిబారకుండా అందంగా కనిపిస్తాయి.

* ఒకవేళ చేతులు మరీ పొడిబారితే అందుకు ఓ సమర్థవంతమైన రెమడీ వుంది. అదేమిటంటే.. ఒక పాత్రలో అరటిపండు గుజ్జు తీసుకుని అందులో అరచెంచా తేనే వేసి బాగా కలుపుకోవాలి. పేస్టులా తయారుచేసుకున్న అనంతరం దాన్ని చేతులకు రాసుకోవాలి. కొద్దిసేపు తర్వాత గోరువెచ్చని నీటితో శుభ్రం చేసుకుంటే సరిపోతుంది.