బేబీ స్కిన్ పొందాలా.. అయితే ఈ చిట్కాలు పాటించండి

Posted: 07/22/2015 04:52 PM IST

వయస్సు పెరుగుతున్నకొద్దీ చర్మసౌందర్యం తగ్గుతూ వస్తుంది. అలాకాకుండా చర్మసౌందర్యాన్ని మెరుగుపరుచుకుని, బేబీ స్కిన్ లాంటి అందాన్ని సొంతం చేసుకోవాలంటే కొన్ని చిట్కాలు పాటిస్తే చాలు. రకరకాల పదార్థాలతో ఫేషియల్ స్ర్కబ్ చేసుకుంటే.. ఎన్నో ప్రయోజనాలు పొందవచ్చు. చర్మంలోని డెడ్ స్కిన్ సెల్స్ ను తొలగిపోయి, చర్మాన్ని కాంతివంతంగా మార్చుతుంది. అంతే కాదు.. చర్మంలోని రంధ్రాలను తెరచుకొనేలా చేసి వాటిని శుభ్రపరుస్తుంది.. చర్మంలోని బ్లాక్ హెడ్స్ ను తొలగిస్తుంది.. చర్మంలోని మురికిని, ఆయిల్ ను నివారిస్తుంది.. దాంతో చర్మంలో మొటిమలు, మచ్చలు ఏర్పడకుండా శుభ్రం చేస్తుంది. ఈ విధంగా ప్రయోజనాలు కలిగించే ఆ స్ర్కబింగ్ చిట్కాలేంటో తెలుసుకుందామా..

గ్రీన్ టీ స్ర్కబ్ : ముందుగా గ్రీన్ టీని షుగర్ లేకుండా తయారుచేయాలి. తర్వాత దాన్ని చల్లార్చి అందులో కొద్దిగా పంచదార వేసి చిక్కగా చేయాలి. అందులోనే కొద్దిగా తేనె కూడా మిక్స్ చేయాలి. గట్టిగా స్ర్కబ్బింగ్ లా తయారుచేసుకన్న తర్వాత ముఖానికి, మెడకు పట్టించాలి. 20నిముషాల తర్వాత స్ర్కబ్ చేసి శుభ్రం చేసుకోవాలి. ఇలా చేయడం వల్ల చర్మానికి నేచురల్ గ్లో వస్తుంది.

బొప్పాయి : బాగా పండిన బొప్పాయిలో కొద్దిగా పంచదార వేసి మిక్స్ చేయాలి. అనంతరం ఈ మిశ్రమాన్ని వెంటనే ముఖానికి పట్టించి బాగా మర్ధన చేయాలి. కొద్దిసేపటి తర్వాత చల్లటి నీటితో శుభ్రం చేసుకోవాలి. ఇలా చేసుకోవడం వల్ల చర్మం మృదువుగా, ఎంతో సున్నితంగా తయారవడంతోపాటు ప్రకాశవంతంగా మారుతుంది.

కాఫీ : కొన్ని కాఫీ గింజలను రఫ్ గా పొడి చేసి అందులో ఆలివ్ ఆయిల్, తేనె వేసి మిక్స్ చేసుకోవాలి. ఈ మిశ్రమాన్ని ముఖానికి సున్నితంగా పట్టించి.. 15 నిముషాల తర్వాత మసాజ్ చేయాలి. ఇలా చేసుకోవడం వల్ల మొటిమలను నివారించబడుతాయి.

చాక్లెట్ స్ర్కబ్ : ఒక పాత్రలో కొద్దిగా బాదం నూనె, పంచదార వేసి కలుపుకోవాలి. అందులో కాస్త చాక్లెట్ వేసి మొత్తం వేడి చేసి, కరిగించాలి. ఈ మిశ్రమాన్ని చర్మానికి పట్టించాలి. ఇది చర్మానికి పోషణను అందించడంతోపాటు నేచురల్ గ్లోను అందిస్తుంది.

టమోటో : ముందుగా టమోటోను మెత్తగా చేసి అందులో పంచదార వేసి బాగా కలియబెట్టాలి. ఈ మిశ్రమాన్ని ముఖానికి పట్టించి 15 నిముషాలు బాగా మర్ధన చేసుకోవాలి. తర్వాత చల్లటి నీటితో శుభ్రం చేసుకోవాలి. ఇలా చేయడం వల్ల చర్మం శుభ్రపడుతుంది.