మురికిని తొలగించి తేజస్సు పెంచే ఆరెంజ్

Posted: 08/25/2015 12:22 PM IST

ముఖతేజస్సును మెరుగుపరిచే పోషకాలు పుష్కలంగా కలిగివున్న పండ్లలో ‘ఆరెంజ్’ ఒకటి. ఆరోగ్యానికి మేలు చేసే పొషక విలువలు కలిగిన ఈ ఆరంజ్ పళ్లు.. అందానికీ కూడా మేలు చేస్తాయి. వాతావరణంలో వచ్చే మార్పుల కారణంగా.. ముఖంపై మురికీ, జిడ్డు పేరుకుపోతుంటుంది. దాంతో అందం విహీనంగా మారడం, ముఖం నల్లగా కనబడటం వంటి సమస్యలు తప్పవు. వీటి నుంచి విముక్తి పొంది, ముఖ తేజస్సు పొందాలంటే.. ఖరీదైన క్రీములు, పౌడర్లూ వాడటం కంటే ప్రకృతిసహజంగా లభించే ఆరెంజ్ వాడటం ఎంతో శ్రేయస్కరమని నిపుణులు అంటున్నారు. కేవలం ఆరెంజ్ మాత్రమే కాదు.. మరెన్నో రెమెడీలున్నాయి. మరి.. ఆ రెమెడీలేంటో తెలుసుకుందామా..

* ముందుగా ఆరంజ్ తొక్కలను బాగా ఎండబెట్టి, వాటిని పొడికేసుకోవాలి. ఆ పొడిలో ఒక స్పూన్ నారింజ పొడిని ఓ పాత్రలో తీసుకుని, అందులో కాస్త పెరుగు వేసి బాగా కలియబెట్టాలి. ఈ మిశ్రమాన్ని ముఖానికి ప్యాక్‌లా వేయాలి. 20 నిముషాల తర్వాత వేళ్లతో వలయాకారంగా రుద్దుతూ నీళ్లతో కడిగేయాలి. ఇలా రెగ్యులర్ గా చేస్తే.. ముఖానికి మంచి ఛాయ వస్తుంది.

* ముఖం మురికి దూరమయ్యేలా, మొటిమలు రాకుండా వుండాలంటే.. ఎప్పటికప్పుడు జాగ్రత్తలు పాటించాల్సి వుంటుంది. పడుకునే ముందు గులాబీ నీళ్లూ, గ్లిజరిన్ కలిపిన మిశ్రమాన్ని ముఖానికి రాసుకుని, ఉదయాన్నే కడిగేస్తే ముఖం తాజాగా మారుతుంది.

* ఒక టీస్పూన్ ముల్లంగి రసంలో నాలుగు చుక్కల నిమ్మరసం వేసి బాగా కలియబెట్టాలి. ఈ మిశ్రమాన్ని ముఖానికి పట్టించి అరగంట తర్వాత గోరువెచ్చని నీళ్లతో కడిగేసుకోవాలి. ఇది బ్లీచింగ్ ఏజెంట్‌గా పనిచేసి ముఖాన్ని శుభ్రపరుస్తుంది.

* ఒక పాత్ర తీసుకుని అందులో ఒక టీస్పూన్ బొప్పాయి గుజ్జు, ముల్తానీ మట్టీ వేసి బాగా కలుపుకోవాలి. ఈ మిశ్రమాన్ని ముఖానికి పట్టించి పది నిమిషాల తర్వాత కడిగేయాలి. ఈ ప్యాక్ ముఖాన్ని తాజాగా మారుస్తుంది.

* ఒక పాత్రలో కొద్దిగా ఓట్స్‌ తీసుకుని అందులో చిటికెడు పసుపు, కొన్ని చుక్కల నిమ్మరసం వేసి బాగా కలుపుకోవాలి. ఈ మిశ్రమాన్ని ముఖానికి పట్టించి 10 నిముషాల తర్వాత కడిగేస్తే ముఖం తాజాగా మారుతుంది.

* ఒక పాత్రలో నాలుగు బాదం గింజలను మిశ్రమంలా చేసి, దానికి ఒక టీ స్పూన్ తేనె కలిపి ముఖానికి పట్టించాలి. ఇరవై నిమిషాల తర్వాత చన్నీళ్లతో కడిగేస్తే మృదువైన చర్మం మీ సొంతమవుతుంది.

* ఒక పాత్రలో కొద్దిగా శెనగపిండి తీసుకుని, అందులో గులాబీ నీళ్లు వేసి బాగా కలుపుకోవాలి. ఈ మిశ్రమాన్ని ముఖానికి పట్టించి అరగంటయ్యాక కడిగేస్తే.. మంచి ఫలితం కనిపిస్తుంది.