చర్మ సౌందర్యానికి సహజ చిట్కాలు

Posted: 10/02/2015 06:42 PM IST

చర్మ సౌందర్యాన్ని మెరుగుపర్చుకోవడం కోసం రకరకాల బ్యూటీ ప్రోడక్టులు వాడాల్సిన అవసరం లేదు.. బ్యూటీపార్లర్లకు వెళ్లాల్సిన అవసరం అంతకన్నా లేదు. ఇంట్లోనే లభ్యమయ్యే కొన్ని సహజ పధార్ధాలతో రెమెడీలు చేసుకుని, వాటిని చర్మానికి పట్టిస్తే కాంతివంతమైన సౌందర్యం సొంతం అవుతుంది. మరి.. ఆ చిట్కాలేంటో తెలుసుకుందామా..

* రెండు చెంచాల టమోటో గుజ్జులో, చెంచా కీరదోస గుజ్జూ, రెండు చెంచాల ఓట్స్ పొడీ, చెంచా పుదీనా ఆకుల మిశ్రమం కలపాలి. ఈ మిశ్రమాన్ని ముఖానికి రాసి పావు గంటయ్యాక గోరువెచ్చని నీళ్లతో కడిగేయాలి. ఈ ప్యాక్‌తో ముఖానికి తాజాదనం వస్తుంది. ఒక టమోటోని గుజ్జులా చేసి దానికి చెంచా నిమ్మరసం, అర చెంచా ఓట్స్ పొడీ కలిపి ముఖానికి రాసుకుని, కాసేపు వేళ్లతో రుద్దాలి. తరువాత చన్నీళ్లతో కడిగేస్తే చర్మం మృదువుగా మారుతుంది.

* తాజా బొప్పాయిలో కొద్దిగా కొబ్బరిపాలు కలిపి.. ఆ మిశ్రమాన్ని చర్మానికి రాసుకుంటే చర్మం మృదువుగా, శాటిన్ లా, మెత్తగా మారుతుంది. దోమలు కుడితే నిమ్మరసంకు కొంచెం నీరు కలిపి దూదితో దోమ కుట్టిన చోట రుద్దితే మంట తగ్గిపోతుంది. నారింజ రసంోబ పాలు కలిపి ముఖానికి, చేతులకు నెలరోజులపాటు క్రమం తప్పకుండా పట్టిస్తే.. మచ్చలు, చర్మ సంబంధ సమస్యలు మాయమవుతాయి.

* రెండు చెంచాల టమోటో రసంలో మూడు చెంచాల మజ్జిగ వేసి బాగా కలపాలి. దీన్ని ముఖానికి పట్టించి అర గంట తర్వాత చన్నీళ్లతో కడిగేస్తే ముఖం తాజాగా మారుతుంది. ఒక టమోటోని మెత్తగా చేసి దానికి చెంచా పెరుగూ, అరచెంచా తేనె, మూడు చెంచాల సెనగపిండీ వేసి కలపాలి. ఈ మిశ్రమాన్ని ముఖానికి పూతలా వేసుకుని ఆరాక కడిగేస్తే ఫలితం ఉంటుంది.

* స్కిన్ టోనర్లకు బదులుగా చర్మానికి నిమ్మకాయ రసాన్ని వాడటం బెటరని బ్యూటీషన్లు అంటున్నారు. తద్వారా చర్మానికి ఎలాంటి సైడ్ ఎఫెక్ట్ ఉండవని వారంటున్నారు. అలాగే చర్మాన్ని పరిశుభ్రపరచడానికి ఒక మెరుపులాంటి ఛాయను ఇవ్వడానికి మాయిశ్చరైజింగ్ ఎంతగానో ఉపయోగపడుతుంది. అయితే క్రమం తప్పకుండా మాయిశ్చరైజ్ చేసుకోవాలి.

* టమోటాలో చర్మానికి మేలు చేసే బోలెడు పోషకాలున్నాయి. జిడ్డు చర్మం ఉన్నవారికి టమోటాలు చాలా బాగా ఉపయోగపడతాయి. టమోటాని సగానికి కోసి ముఖానికి, చేతులకు రుద్ది.. పావుగంట తర్వాత కడిగేయాలి. ఇలా రెగ్యులర్ గా చేస్తే.. చర్మం శుభ్రపడుతుంది.. బ్లాక్ హెడ్స్ తగ్గుతాయి.. చర్మ రంద్రాలు శుభ్రపడతాయి.