శిరోజాల అందాన్ని మెరుగుపరిచే ‘పచ్చని ఆకులు’

Posted: 11/14/2015 01:39 PM IST

శిరోజాల అందాన్ని మెరుగుపరచడంలో సహజసిద్ధమైన పచ్చని ఆకులు ప్రముఖ పాత్ర పోషిస్తాయని బ్యూటీషియన్లు అంటున్నారు. నిపుణులు జరిపిన పరిశోధనల్లో భాగంగా.. ఈ ఆకులు ఏ విధంగా ఆరోగ్యాన్ని మెరుగుపరుస్తాయో.. అలాగే శిరోజాల అందాన్ని కాపాడటంలోనూ ముందున్నాయని తేలింది. అందుకే.. కేశాల సౌందర్యాన్ని కాపాడుకోవాలంటే రసాయనాల వాడకం లేకుండా సహజసిద్ధమైన ఈ ఆకులను వాడటమే ఎంతో శ్రేయస్కరమని చెబుతున్నారు.

* కొబ్బరినూనెలో తగినన్ని కరివేప ఆకులను వేసి మరిగించి, చల్లారనివ్వాలి. ఈ మిశ్రమాన్ని జుట్టు కుదుళ్లకు పట్టించి, మసాజ్‌చేసుకోవాలి. వారానికి రెండుసార్లు ఈ విధంగా చేయడం వల్ల జుట్టు రాలడం, తెల్లబడటం వంటి సమస్యలు తగ్గుతాయి. కొబ్బరినూనెలోని ప్రొటీన్లు జుట్టుకుదుళ్లకు బలాన్ని ఇస్తాయి. కరివేపాకు కేశాలు చిట్లకుండా మాయిశ్చరైజర్‌లా ఉపయోగపడుతుంది. లీటర్ నీటిలో గుప్పెడు వేప ఆకులు వేసి మరిగించాలి. ఈ నీళ్లు చల్లారాక తలకు పట్టించాలి. పది-ఇరవై నిమిషాలు అలాగే ఉంచి, తర్వాత శుభ్రపరచుకోవాలి. వారానికి నాలుగుసార్లు ఈ విధంగా చేస్తూ ఉంటే జుట్టు రాలడం తగ్గుముఖం పడుతుంది.

* తులసి ఆకులో మెగ్నీషియం అధికంగా ఉంటుంది. అలాగే మన ఆరోగ్యానికి ఉపయోగపడే వందల రకాల ఓషధులు తులసిలో ఉన్నాయి. గుప్పెడు తులసి ఆకులను ముద్దగా నూరి, అర లీటర్ నీటిలో వేసి మరిగించాలి. ఈ నీరు చల్లారిన తర్వాత తలకు పట్టించి, పది నుంచి పదిహేను నిమిషాలు ఉంచి కడిగేయాలి. వెంట్రుక చిట్లడం తగ్గుతుంది. రక్తప్రసరణ మెరుగవుతుంది. కుదుళ్లు బలపడి వెంట్రుకల ఎదుగుదల బాగుంటుంది. వారానికి ఒకసారైనా తులసి చికిత్స శిరోజాలకు ఎంతో మేలు చేస్తుంది.

* జామ ఆకు... ఇది కురుల కుదుళ్లను బలపరచడమే కాదు, నిగనిగలనూ పెంచుతుంది. లీటర్ నీటిలో గుప్పెడు జామ ఆకులను వేసి అరగంటసేపు అలాగే ఉంచాలి. తర్వాత ఆ నీటిని మరిగించి, పూర్తి వేడి తగ్గేంతవరకు ఉంచాలి. ఆ తర్వాత వడకట్టి, ఆకులను తీసేయాలి. ఇప్పుడు ఈ నీటిని జుట్టు కుదుళ్లకు పట్టించాలి. జామ ఆకులో ఉండే ఔషధగుణాలు మరిగించడంతో నీటిలోకి వచ్చేస్తాయి. ఆ నీటిని తలకు వాడటం వల్ల కుదుళ్లు బలపడి, జుట్టు రాలడం తగ్గుతుంది.