Posted: 11/30/2012 01:15 PM IST

       

      షారుఖ్‌ఖాన్, కత్రినా కైఫ్, అనుష్క శర్మ సినిమా 'జబ్ తక్ హై జాన్'...,  అజయ్ దేవ్‌గన్, సోనాక్షి సిన్హా మూవీ 'సన్ ఆఫ్ సర్దార్' ఈ రెండు సినిమాలూ విడుదలైన నాటినుంచీ సంచలనం రేకెత్తిస్తున్నాయి. దీపావళి సీజన్‌లో నవంబర్ 13న విడుదలైన ఈ రెండు సినిమాలు దేశంలోని థియేటర్లను పంచుకుని కూడా రూ. 100 కోట్ల (నెట్) వసూళ్లని సాధించి చరిత్ర సృష్టించాయి. అంటే రెండూ కలిపి రూ.200 కోట్లు పైగా కొల్లగొట్టాయి.
        'జబ్ తక్ హై జాన్' (జె.టి.హెచ్.జె.) ప్రఖ్యాత దర్శకుడు యశ్ చోప్రా చివరి చిత్రం కావడం గమనార్హం. తన 'సన్ ఆఫ్ సర్దార్' (ఎస్.ఓ.ఎస్.) కంటే ఈ సినిమాకి చాలా ఎక్కువ థియేటర్లు లభించేలా యశ్‌రాజ్ ఫిలిమ్స్ సంస్థ ఎగ్జిబిటర్లను ప్రభావితం చేసిందంటూ అజయ్ దేవ్‌గన్ ఆరోపించడమూ, సంబంధిత సంస్థకు ఫిర్యాదు చేయడమూ హెడ్‌లైన్స్‌ కి ఎక్కింది. 'ఎస్.ఓ.ఎస్.'లో అజయ్ సరసన నాయికగా సోనాక్షి సిన్హా నటించగా, విలన్ కేరక్టర్‌ను సంజయ్‌దత్ చేశాడు. వివాదం సంగతి ఎలా ఉన్నా రెండు సినిమాలూ కమర్షియల్‌గా పెద్ద విజయాలు సాధించాయి.

       సుమారు రూ. 50 కోట్ల బడ్జెట్‌తో రూపొందిన 'జె.టి.హెచ్.జె.' 15 రోజుల్లోనే రూ. 116.29 కోట్ల (నెట్) వసూళ్లు సాధించగా, సుమారు రూ. 30 కోట్లతో తయారైన 'ఎస్.ఓ.ఎస్.' ఇన్నే రోజుల్లో సరిగ్గా వంద కోట్ల మార్కును దాటి రూ. 100.55 కోట్ల (నెట్) వసూళ్లు సంపాదించింది. రెండూ కలిపి సంపాదించింది రూ. 216.84 కోట్లు. ఈ వసూళ్లు కేవలం దేశీయంగానే వచ్చినవి కావడం ఇక్కడ విశేషం. ఓవర్సీస్ వసూళ్లు జోడిస్తే ఇవి సాధించిన వసూళ్లు ఇంకా పెరుగుతాయి.
      అజయ్ దేవ్‌గన్ 'ఎస్.ఓ.ఎస్.' సినిమా తెలుగులో యస్.యస్. రాజమౌళి రూపొందించగా ఘన విజయం సాధించిన 'మర్యాదరామన్న'కు రీమేక్ అనే సంగతి తెలిసిందే. ఆ కథకి పంజాబీ నేపథ్యాన్ని జోడించి అశ్వినీధీర్ డైరెక్ట్ చేసిన 'సన్ ఆఫ్ సర్దార్' మాస్ ఆడియెన్స్‌ ని బాగా ఎట్రాక్ట్ చేయటంతో ఈ ఘనవిజయాలు సాధ్యమయ్యాయి.

        కాగా ‘జబ్ తక్ హే జాన్’ చిత్రాన్ని తెలుగు లో ఫ్రీమేక్ లేదా రీమేక్ చేసేందుకు ఓ అగ్రనిర్మాత సన్నాహాలు చేస్తున్నారు. ఇందులో నటించేందుకు ఓ స్టార్ హీరో ఓకే చెప్పినట్టు తెలుస్తోంది. త్వరలోనే పూర్తి వివరాలు వెల్లడవుతాయి.

...avnk