రామానాయుడు జూనియర్ తో సినిమా

Posted: 06/06/2013 07:13 PM IST

వంద సంవత్సరాల సినీ చరిత్రలో రామానాయుడి గారికి యాభై ఏళ్ళ ప్రస్థానం. ఈ ప్రయాణంలో ఎన్నో ఒడిదొడుకులు ఎదుర్కొన్న రామానాయుడు గారు నిర్మాతగా నిలబడటానికి మూలం ఆ కాలంలో వచ్చిన రాముడు-భీముడు సినిమానే. ఆ సినిమా ఎంత పెద్ద హిట్ అయిందో వేరే చెప్పాల్సిన అవసరం లేదు. ఈ సినిమాను నిర్మించిన రామానాయుడు దీనిని జూనియర్ ఎన్టీఆర్ తో రీమేక్ చేయాలని ఎప్పటి నుండో చూస్తున్నాడు. తన పుట్టిన రోజు సందర్భంగా మాట్లాడుతూ... ఈ సినిమాను కలర్లో తీయడానికి ఎన్టీఆర్‌తో మాట్లాడాను. చేస్తానన్నాడు. తను ఎప్పుడంటే అప్పుడు చేస్తాను. ఈ సినిమాని ఎన్టీ రామారావుగారి కుటుంబానికి చెందినవాళ్లు చేస్తేనే బాగుంటుంది. ఒకవేళ ఈ రీమేక్ కుదరకపోతే.. పాత ‘రాముడు-భీముడు'ని కలర్‌లోకైనా మార్చుతాను అన్నారు ప్రముఖ నిర్మాత డి.రామానాయుడు. అప్పట్లో అది నలుపు-తెలుపు సినిమా. ఒకవేళ ఇప్పుడు రీమేక్ చేస్తే చక్కగా కలర్లో తీయొచ్చు. కుదరకపోతే.. కనీసం రంగుల్లో అయినా చూసుకుందామని కలర్‌కి మార్చాలనుకుంటున్నాను అని చెప్పారు. ఒకవేళ అన్నీ కుదిరితే ఈ సినిమా రీమేక్ కి ఎవరు దర్శకత్వం వహిస్తారు అనేది ప్రశ్న.