‘మనం ’ లో అక్కినేని అఖిల్

Posted: 06/06/2013 11:15 AM IST

ప్రముఖ నటుడు అక్కినేని నాగార్జున రెండో కొడుకు అక్కినేని అఖిల్ వెండితెర అరంగ్రేటం చేయబోతున్నాడనే వార్తలు గత కొంత కాలం నుండి వినిపిస్తున్న సంగతి తెలిసిందే. అయితే ఈ మధ్య కాలంలో ఇవి మరీ ఎక్కువయ్యాయి. ఈ ఎంట్రీ ప్రముఖ దర్శకుడు రాజమౌళి తో ఉంటుందని, ఆయన కుటుంబ బ్యానర్ లో ఈయనను పరిచయం చేయబోతున్నారని వార్తలు వచ్చాయి. ఈ వార్తల పై ఇరు వర్గాల వారు ఖండించలేదు కూడా. అయితే ఆ సినిమా కన్నా ముందే అఖిల్ వెండితెర పై కనిపించబోతున్నట్లు తాజా సమాచారం. అక్కినేని కుటుంబం అంతా కలిసి నటించబోయే ఈ భారీ సినిమాలో అఖిల్ కూడా ఓ పాత్ర చేయబోతున్నట్లు వార్తలు వస్తున్నాయి. అఖిల్ మొదటి సినిమాకు వేదిక ఇదే సరైందని భావించిన ఆ కుటుంబం దర్శకుడికి ప్రత్యేకంగా ఓ పాత్రను క్రియేట్ చేయమని కోరారని సమాచారం. నాగేశ్వరరావు, నాగార్జున, నాగచైతన్య కథానాయకులుగా నటిస్తున్న చిత్రమిది. శ్రియ, సమంత కథానాయికలు. విక్రమ్ కె.కుమార్ దర్శకత్వం వహిస్తున్నారు. ప్రస్తుతం ఆ పనిలో బిజీగా ఉన్న దర్శకుడు  ఈ సినిమా రెగ్యులర్ షూటింగ్ కోసం సన్నాహాలు చేస్తున్నాడట. ఏది ఏమైనా అఖిల్ కూడా ఈ సినిమాలో నటించబోతున్నాడనే విషయాన్ని తెలుసుకున్న అభిమానులు ఈ సినిమా పై మరిన్ని ఆశలు పెంచుకున్నారు.