అమ్మాయి వేషంలో అదరగొడుతున్న సుమంత్

Posted: 12/26/2013 10:18 AM IST

అక్కినేని ఫ్యామిలీ నుండి వచ్చి కెరియర్ మొదట్లో రెండు మూడు హిట్ సినిమాల్లో నటించి స్టార్ హీరోగా ఎదిగే సమయంలో సరైన హిట్లు లేక వెనకబడిపోయిన హీరో సుమంత్ గత కొంత కాలం నుండి వెండితెర పై కనిపించకుండా పోయాడు. ఆ మధ్యలో ‘దగ్గరగా దూరంగా ’ అంటూ ఓ సారి ప్రేక్షకుల్ని పలకరించిన మళ్లీ ఎప్పుడు ‘ఏమో గుర్రం ఎగురవచ్చు ’ అంటూ ప్రేక్షకుల ముందుకు రాబోతున్నాడు.

చంద్ర సిద్దార్థ్ దర్శకత్వంలో తెరకెక్కిన ఈ సినిమాలో సుమంత్ లేడీ గెటప్ లో కనిపించబోతున్నాడు. ఈ సినిమాలో సుమంత్ వేసిన ఆడవేశానికి సంబంధించిన ఫోటో ఒకటి ఇప్పుడు హల్ చల్ చేస్తుంది. ఈ ఫోటోలో సుమంత్ అచ్చం ఆడపిల్లలా ముద్దొచ్చేలా ఉన్నాడు. ఈ ఫోటో చూసిన సినీ జనాలు హీరోకి ఈ కళ కూడా వుందా ? అని అనుకుంటున్నారు.

చీరకట్టులో వయ్యారాలు పోతూ డ్యాన్స్ చేస్తున్న సుమంత్ ఫోటో ఇప్పుడు నెటిజన్లను ఆకట్టుకుంటుంది. దర్శకుడు రాజమౌళి సోదరుడు కాంచి చిత్రానికి కథను అందించాడు. సుమంత్ సరసన పింకీ సావిక హీరోయిన్. ఈ లేడీ గెటప్ లో ప్రేక్షకులను ఏ మాత్రం మెప్పిస్తాడో చూడాలి.