సంగీత దర్శకుడు చక్రి ఇక లేరు

Posted: 12/15/2014 09:11 AM IST

తెలుగు సినిమా లోకంలో మరో దృవతార నేల రాలింది. తన పాటలతో తెలుగు ప్రజల నోట మార్మోగిన సంగీత దర్శకుడు చక్రి (40) అలియాస్ చక్రధర్ గిల్ల ఇక లేరు. గుండెపోటుతో సోమవారం తెల్లవారుజామున  తిరిగిరాని లోకాలకు వెళ్లారు. చక్రికి గుండెపోటు రావటంతో కుటుంబ సభ్యులు అపోలో ఆస్పత్రికి తీసుకెళ్ళారు. ఐసీయూలో చికిత్స పొందుతూ ఈ ఉదయం తుదిశ్వాస విడిచారు. చక్రి మరణ వార్త విన్న సన్నిహితులు షాక్ కు గురయ్యారు.

వరంగల్ జిల్లా మహబూబాబాద్ కు చెందిన చక్రి 1974 జూన్ 15న జన్మించారు. పూరి జగన్నాధ్ డైరెక్షన్ లో వచ్చిన ‘బాచి’ సినిమాతో సంగీత దర్శకుడిగా కెరీర్ ప్రారంభంచారు. ‘ఇడియట్’, ‘ఇట్లు శ్రావణి సుబ్రహ్మణ్యం’, ‘అవును వాళ్లిద్దరూ ఇష్టపడ్డారు’, ‘దేశ ముదురు’, ‘సత్యం’, ‘గోపి గోపిక గోదావరి’, ‘సింహ’ వంటి సినిమాలకు సంగీతం అందించారు. కెరీర్ లో 85 సినిమాలకు  సంగీత దర్శకుడిగా పనిచేశారు. ‘సింహ’ సినిమాకు ఉత్తమ సంగీత దర్శకుడిగా నంది అవార్డు అందుకున్నారు. చివరగా సంగీతం అందించిన ‘రేయ్’ సినిమా విడుదల కావాల్సి ఉంది.

మధురమైన సంగీత స్వరాలతో పాటలు అందించే మ్యూజిక్ డైరెక్టర్ గా చక్రి మంచి పేరు సంపాదించుకున్నారు. ఆయన మరణం పట్ల తెలుగు సినీ పరిశ్రమ దిగ్బ్రాంతి వ్యక్తం చేసింది. అటు తెలంగాణ సినీ కళాకారుల సంఘం కూడా చక్రి మరణం  పట్ల విచారం వ్యక్తం చేసింది. చక్రి  ఆత్మకు శాంతి చేకూరాలని కోరుకుంటూ ఆయన కుటుంబానికి ‘తెలుగు విశేష్’ ప్రగాడ సానుభూతి తెలుపుతోంది.  

 

 

కార్తిక్