రోడ్లపై పడుకుంటే అలాగే చస్తారంటున్న సింగర్

Posted: 05/06/2015 05:44 PM IST

‘హిట్ అండ్ రన్’ కేసులో ప్రముఖ బాలీవుడ్ స్టార్ హీరో సల్మాన్ ఖాన్ కు తాజాగా ముంబై సెషన్స్ కోర్టు ఐదేళ్ల జైలు శిక్ష విధిస్తూ తీర్పునిచ్చిన విషయం తెలిసిందే. కోర్టు తీర్పుకు గౌరవిస్తూనే కొన్ని లక్షల మంది సల్మాన్ కు మద్ధతునిస్తున్నారు. ఇప్పటికే చాలా మంది సినీతారలు, ప్రముఖులు సల్మాన్ ను పరామర్శించారు. అయితే సల్మాన్ కు కోర్టు శిక్ష విధించడంపై ప్రముఖ ప్లే బ్యాక్ సింగర్ అభిజిత్ తీవ్ర ఆగ్రహం వ్యక్తం చేస్తున్నాడు.

అభిజిత్ స్పందిస్తూ... రోడ్లున్నవి కార్లు మరియు కుక్కలు వెళ్లడానికే తప్ప మనుషులు పడుకోవడానికి కాదు. కుక్కలు రోడ్డుపై పడుకుంటే చస్తాయి. రోడ్లు వున్నవి పేదవారు పడుకోవడం కోసం కాదు. నేను కూడా చాలా కాలంగా ఇళ్లు లేకుండా వున్నాను. అలాగని రోడ్లపై పడుకోలేదంటూ అభిజిత్ తన సోషల్ మీడియాలో ట్వీట్ చేసాడు.

అంతే కాకుండా రోడ్డు పక్కన పడుకోవాలనుకుంటే మీ ఊళ్లోకి వెళ్లి పడుకోండి... ఇలా ముంబై లాంటి మహానగరాలకు వచ్చి పడుకోవద్దు. ఇక్కడ ఫుట్ పాత్ లు కట్టింది పడుకోవడానికి కాదు. సూసైడ్ అనేది నేరం. ఫుట్ పాత్ మీద పడుకోవడం కూడా ఒక ఆత్మహత్య చేసుకోవడం లాంటిదేనని చెప్పుకొచ్చాడు. ఈ సంధర్భంగా సల్మాన్ కు అందరూ మద్దతు ఇవ్వాల్సిందిగా అభిజిత్ తన సోషల్ మీడియా ద్వారా కోరాడు.

అయితే ఈ విషయంపై సాధారణ ప్రజలు సైతం వ్యతిరేకంగా ఆగ్రహించడంతో మళ్లీ తన మాటలను వేరే ఉద్దేశ్య పూర్వకంగా అన్నట్లుగా అభిజిత్ చెప్పుకొచ్చాడు. తన మాటలపై వివరణ ఇచ్చుకుంటూ... మనుషులు కుక్కల్లా ఫుట్ పాత్ లపై పడుకోరాదన్నదే తన ఉద్దేశమని, తన దృష్టిల్లో ప్రతి మనిషి గౌరవింపదగిన వాడేనని చెప్పుకొచ్చాడు.