బాహుబలి బ్లాక్ బస్టర్ హిట్టవ్వలంటున్న శ్రీమంతుడు

Posted: 06/26/2015 09:45 AM IST

Mahesh babu best wishes to baahubali film

మహేష్ బాబు హీరోగా నటించిన ‘శ్రీమంతుడు’ చిత్ర విడుదలను ‘బాహుబలి’ సినిమా కోసం ఇటీవలే వాయిదా వేసిన విషయం తెలిసిందే. అయితే ఈ విషయంపై తాజాగా ‘శ్రీమంతుడు’ హీరో మహేష్ బాబు స్పందించారు. ఈ విషయంపై మహేష్ మాట్లాడుతూ... ‘బాహుబలి’ లాంటి పెద్ద సినిమా మన తెలుగు ఇండస్ట్రీ నుంచి రావడం చాలా గర్వించదగ్గ విషయం. అందరిలాగే తాను కూడా ఈ సినిమా విడుదల కోసం ఎదురుచూస్తున్నాని అన్నారు. ‘బాహుబలి’ వంటి సినిమా విడుదలవుతున్నపుడు దానికోసం వేరే సినిమాలు రెండు, మూడు వారాలు గ్యాప్ ఇస్తేనే బాగుంటుంది. అలా కాకుండా వెంటనే మరో సినిమా విడుదలైతే బాగోదు అని అన్నారు.

అంతే కాకుండా ‘బాహుబలి’ సినిమాకు ఏమన్నా అయితే ఆ ఎఫెక్ట్ మిగతా సినిమాలపై కూడా ప్రభావం చూపుతుంది కాబట్టి. అలాంటి పెద్ద సినిమాలకు మరో పెద్ద సినిమా గ్యాప్ ఇవ్వడమే మంచిదని అన్నారు. అలాగే ‘బాహుబలి’ సినిమా విడుదలై ఇండస్ట్రీ బ్లాక్ బస్టర్ హిట్టవ్వాలని కోరుకుంటున్నానని, అలాగే రాబోయే తన ‘శ్రీమంతుడు’ సినిమా కూడా మంచి విజయం సాధించాలని కోరుకుంటున్నట్లుగా మహేష్ తెలిపాడు.

భారీ బడ్జెట్ తో ప్రతిష్టాత్మకంగా రూపొందించిన ‘బాహుబలి’ చిత్రం జులై 10న ప్రపంచ వ్యాప్తంగా తెలుగు, తమిళం, హిందీ, మలయాళం భాషలలో గ్రాండ్ గా విడుదల కానుంది. ఎస్.ఎస్.రాజమౌళి దర్శకత్వంలో తెరకెక్కిన ఈ చిత్రంలో ప్రభాస్, రానా, తమన్నా, అనుష్క ప్రధాన పాత్రలలో నటించారు. కీరవాణి సంగీతం అందించారు.