జేడీ చక్రవర్తి సీక్రెట్ వెడ్డింగ్

Posted: 08/19/2016 09:30 AM IST

Jd chakravarthy marries anukriti secretly

టాలీవుడ్ నటుడు జేడీ చక్రవర్తి ఓ ఇంటి వాడయ్యాడు. ఈ మధ్య వివాదాలతో బాగా పాపులర్ అయిన నటి అనుకృతిని వివాహం చేసుకున్నాడు. కేవలం కుటుంబ సభ్యుల మధ్యే జేడీ సీక్రెట్ వెడ్డింగ్ జరిగింది. గత కొంతకాలంగా అనుకృతి శర్మ, జెడీ మధ్యన ప్రేమ కథ నడుస్తోందని తెలుస్తోంది. వర్మ శిష్యుడైన జేడీ శివ సినిమాతో తెలుగు తెరకు పరిచయమయ్యాడు. ఆపై కృష్ణవంశీ గులాబీతో అమ్మాయిల గుండెల్లో ప్రేమ బాణాలు గుచ్చాడు. కానీ, ఆ రేంజ్ హిట్ తర్వాత మనోడికి పడలేదు.

హీరోగానే కాదు, దర్శకుడిగా, నిర్మాతగా కూడా పలు చిత్రాలను తీశాడు. ఇన్నాళ్లు కెరీర్ లోనే మునిగిపోయిన జేడీ 40 ఫ్లస్ లో పెళ్లి చేసుకోవటం విశేషం. ఇక అనుకృతి విషయానికి వస్తే రాంగోపాల్ వర్మ శ్రీదేవీ(శ్రీదేవీ గొడవ చేయటంతో సావిత్రిగా మార్చారు లేండి) సినిమా కోసం తీసుకున్న హీరోయిన్. అంతేకాదు ఈ మధ్య పాప అనే చిత్రంలో వల్గర్ సీన్ లలో నటించనంటూ గొడవపడి మీడియాకు ఎక్కిందే ఆమె. ఢిల్లీకి చెందిన వ్యాపారవేత్త కూతురుతో జేడీ వివాహం జరగనుందంటూ ఇంతకు ముందు వార్తలు ఎన్నో గుప్పుమన్నా, చివరకు ఇండస్ట్రీకి చెందిన అనునే పెళ్లి చేసుకున్నాడు.

ఇక శ్రీదేవి సినిమాని జెడీ చక్రవర్తి డైరక్ట్ చేసే ప్రయత్నంలో పరిచయం కాస్త ప్రేమ, ఆపై వివాహంకు దారితీసిందని తెలుస్తోంది. ఈ వెడ్డింగ్ కు సంబంధించి చిన్న లీక్ కూడా బయిటకు రాకుండా జాగ్రత్తలు తీసుకున్నారు. అయితే ఫోటోలు కొన్ని బయటకు రావటంతో విషయం వెలుగులోకి వచ్చింది. దీంతో జేడీ విషెస్ చెబుతూ మెసేజ్ లో సోషల్ నెట్ వర్క్ లో కనిపిస్తున్నాయి. వివాహాం జరిగిందన్న విషయం అతిత్వరలో మీడియాకు అఫీషియల్ గా అనౌన్స్ చేస్తారని సన్నిహితులు చెబుతున్నారు.ఇంకోవైపు తన ప్రియ శిష్యుడి పెళ్లి పై వర్మ ఎలా స్పందిస్తాడా అని సినీ జనం అంతా ఆసక్తిగా ఎదురుచూస్తున్నారు. సోలో లైఫ్ కి స్వస్తి చెప్పి, ఓ ఇంటివాడైన ఈ గడ్డం చక్రవర్తికి తెలుగు విశేష్ తరపున శుభాకాంక్షలు.