డిసెంబర్ 2 నుంచి సెట్స్ పైకి యంగ్ రెబల్ స్టార్ ‘ప్రాజెక్టు కె’

Posted: 11/26/2021 07:56 PM IST

Prabhas all set for project k prabhas news

యంగ్ రెబల్ స్టార్ ప్రభాస్ భారతీయ సినిమా చరిత్రలోనే టాప్ హీరోగా నిలిచాడు. బాహుబలి సిరీస్ చిత్రాలతో పాటు సాహో చిత్రం ఆయనను అఖిలభారత ప్రేక్షకులకు చేరువ చేసింది. ప్రస్తుతం యావత్ భారతీయ సినీ చరిత్రలోనే ఎవరూ తీసుకోనంత రెన్యూమరేషన్ ఆయన ఒక్కో చిత్రానికి తీసుకుంటున్నారు. ప్రస్తుతం ఆయన ఒక్కో చిత్రానికి ఏకంగా రూ. 150 కోట్లు తీసుకుంటున్నారని టాక్ వినిపిస్తోంది. ఆయన నటించిన తాజా చిత్రం 'రాధే శ్యామ్' సంక్రాంతి పర్వదినాన్ని పురస్కరించుకుని ప్రేక్షకుల ముందుకు వచ్చేందుకు రెడీ అవుతోంది.

రాధాకృష్ణ కుమార్ దర్శకత్వం వహించిన ఈ సినిమాను జనవరి 14వ తేదీన థియేటర్లకు తీసుకురానున్నారు. ఇక ఆ తరువాత ప్రాజెక్టుగా ఆయన 'ఆది పురుష్' సినిమాను కూడా పూర్తిచేశాడు. ఓం రౌత్ దర్శకత్వంలో రామాయణ ఇతివృత్తంతో ఈ సినిమా రూపొందింది. ఇక ఈ సినిమా తరువాత ప్రభాస్ 'సలార్' పైన పూర్తి దృష్టి పెడతాడనీ, ఈ సినిమా పూర్తయిన తరువాత తన 21 చిత్రంగా రూపోందనున్న 'ప్రాజెక్టు K' పైకి వెళతాడని అంతా అనుకున్నారు.

అయితే సలార్ షూటింగ్ షెడ్యూల్ లో వచ్చిన గ్యాప్ లో ప్రాజెక్ట్ కే తొలి షెడ్యూల్ పూర్తి చేసేలా రెబల్ స్టార్ ప్లాన్ చేశారు. ఈ క్రమంలో వచ్చేనెల 2వ తేదీ నుంచి ప్రభాస్ 'ప్రాజెక్టు K' సెట్స్ పైకి వెళ్లనున్నట్టుగా ఒక టాక్ వినిపిస్తోంది. ఆ రోజున ఈ సినిమా ఫస్టు షెడ్యూల్ ను మొదలుపెడుతున్నారట. 'ప్రాజెక్టు K' ఫస్టు షెడ్యూల్ పూర్తయిన తరువాతనే, ప్రభాస్ తిరిగి 'సలార్' షూటింగులో పాల్గొంటాడట. అక్కడి నుంచి ఆ సినిమా పూర్తయ్యేంతవరకూ దానిపైనే ఉంటాడని అంటున్నారు. మొత్తానికి ప్రభాస్ పక్కా ప్లానింగ్ తోనే దూసుకుపోతున్నాడు. ఇక లైన్లో సందీప్ రెడ్డి వంగా ఉన్న సంగతి తెలిసిందే.