Mopidevi Explains His Business Move

Posted: 02/09/2012 03:46 PM IST

mopidevi అది ఆటల సమయం కాకపోయినా స్కూల్లో పిల్లలు కొంతమంది ఆటలాడుతుంటే చూసిన టీచర్ వాళ్ళందరినీ పిలిచి కోప్పడుతున్నారు. అందులో ఒకడు, "సార్ నేను ఆడలేదు" అంటే సరిపోయేది కానీ, "నేను ఆడతానంటే వీళ్ళు చేర్చుకోలేదు సార్" అని అన్నాడట. "అంటే, చేర్చుకుంటే ఆడేవాడివేగా, వెధవ, పోయి వాళ్ళతో పాటు బయట నిలబడు" అన్నారట అన్నారట అప్పుడా టీచర్.

నిన్న తెదేపా కార్యదర్శి వర్ల రామయ్య ఎక్సైజ్ మంత్రి మోపిదేవి కుమారుడి పేరు మీద బీర్ వ్యాపారం గురించి చేసిన వ్యాఖ్యలను ఖండిస్తూ ఈ రోజు మోపిదేవి సచివాలయంలో మాట్లాడుతూ, తన కుమారుడు రాజీవ్ పేరుతో బీర్ కంపెనీ కోసం రిజిస్టర్ చేసిన మాట వాస్తవమే కానీ వాటికింతవరకూ అనుమతులు రాలేదని అన్నారు. వ్యాపారం కోసం రిజిస్టర్ చేసుకుని ఆ తర్వాత విరమించుకున్నా దాన్ని విమర్శించటం బాగోలేదన్నారు మోపిదేవి. బాధ్యతాయుతమైన పదవిలో ఉండబట్టే ఆ వ్యాపారం తగదని విరమించుకున్నానని కూడా మోపిదేవి అన్నారు. విరమించుకోబట్టి అనుమతులు రాలేదో లేకపోతే అనుమతులు రాక విరమించుకున్నారన్నదానిలో మోపిదేవి మాటల్లో స్పష్టత లేదు.

వ్రతం చెడిందీ ఫలితమూ దక్కలేదన్నట్టు, వ్యాపారానికి కావలసిన అనుమతులూ రాలేదు, ఇప్పుడేమో దాని మీద విమర్శలను ఎదుర్కుంటున్న మోపిదేవి వేదాంత ధోరణిలో, ఎక్సైజ్ శాఖను చూసేవారిమీద ఆరోపణలు రావటం సహజమేనని అన్నారు.

-శ్రీజ