Posted: 05/15/2012 03:21 PM IST

కష్టకాలంలో తాను శ్రీదేవి నటించిన చిత్రాల నుంచి స్ఫూర్తి పొంది, తనకు జరుగుతున్న అన్యాయం పట్ల గళం విప్పానని 'సత్యమేవ జయతే' కార్యక్రమం ద్వారా తనతో మాట్లాడిన అమీర్‌ఖాన్‌కు చెప్పాడు. టీవీ మాధ్యమంలో బాలీవుడ్‌ హీరో అమీర్‌ఖాన్‌ నిర్వహిస్తున్న 'సత్యమేవ జయతే' కార్యక్రమంలో అలనాటి హీరోయిన్‌ శ్రీదేవి ప్రత్యేక అతిథిగా పాల్గొని బాల్యంలోనే లైంగిక వేధింపులకు గురై వేదనపడిన బాధితుడు హరీష్‌ అయ్యర్‌లో ఆశలు నింపింది.

ముంబై వాసి హరీష్‌ సుమారు 11 సంవత్సరాల పాటు బాల్య దశ నుంచి కౌమార ప్రాయం వరకూ తన బంధువు చేతిలోనే లైంగిక వేధింపులకు గురయ్యాడు. అనంతరం అతనిని ఆశ్చర్యానికి గురిచేస్తూ ఈ కార్యక్రమానికి నటి శ్రీదేవిని కూడా తీసుకువచ్చారు. హరీష్‌తో శ్రీదేవి మాట్లాడుతూ.. ''నువ్వు కష్టకాలంలో ఉన్నప్పుడు నా సినిమాల నుంచి స్ఫూర్తి పొందడమన్నది నాకు చాలా ఆనందం కల్గించింది. ముఖ్యంగా నువ్వు పడ్డ కష్టం గురించి మాతో పంచుకోవడం వల్ల ఇలాంటి కష్టాన్ని ఎదుర్కుంటున్న వారిలో ఆశలు చిగురించి ధైర్యవంతులవుతారు.

అప్పుడు నువ్వే నిజమైన హీరో అవుతావు'' అని ప్రోత్సహించింది. బాలలపై కొనసాగుతున్న లైంగిక వేధింపులకు అడ్డుకట్ట వేసేలా కఠినమైన చట్టాలు రావాలంటూ ప్రభుత్వానికి విజ్ఞప్తి చేస్తూ ఒక పత్రంపై కూడా ఆమె సంతకం చేసింది. ఈ సందర్భంగా అమీర్‌ ఖాన్‌ పలువురు బాలలకు లైంగిక వేధింపులను అర్థం చేసుకోవడం గురించి 'గుడ్‌ టచ్‌, బ్యాడ్‌ టచ్‌' పేరిట వర్క్‌ షాప్‌ను నిర్వహించాడు.