Posted: 05/15/2012 02:57 PM IST

తాను కోరుకున్న ప్రియుడి కోసం పెట్టె బేడా సర్దుకుని ఇంటి నుంచి నటి అనన్య ఉడాయించింది. ప్రస్తుతం మలయాళ చిత్ర పరిశ్రమలో జోరుగా జరుగుతున్న ప్రచారం ఇదే. నాడోడిగళ్ చిత్రం ద్వారా కోలీవుడ్‌లోకి వచ్చిన ఈ కేరళ ముద్దుగుమ్మ ఇటీవల నటించిన ఎంగేయుమ్ ఎప్పోదుమ్ చిత్రంలో కూడా మంచి పేరు తెచ్చుకుంది. ప్రస్తుతం మలయాళం, కన్నడ చిత్రాల్లో నటిస్తున్న ఈ అమ్మడు కేరళ రాష్ట్రం తిరుచెందూర్‌కు చెందిన వ్యాపారవేత్త ఆంజనేయులుతో ప్రేమలో పడింది. వీరి ప్రేమకు పెద్దలు గ్రీన్ సిగ్నల్ ఇవ్వడంతో వివాహ నిశ్చితార్థం కూడా జరిగింది.

ఆ తరువాతే కథ అడ్డం తిరిగింది. ఆంజనేయులుకు ఇది వరకే పెళ్లి అయ్యిందని తెలియడంతో అనన్య తల్లిదండ్రులు దిగ్భ్రాంతికి గురయ్యారు. అతనిపై పోలీసులకు ఫిర్యా దు కూడా చేశారు. ఆంజనేయులుకు పెళ్లి అయిన విషయం తనకు తెలుసునని, అయినా ఆయనే వివాహం చేసుకుంటానని అనన్య మొండికేసింది. ఈ విషయంలో అనన్యకు ఆమె తల్లిదండ్రులకు మధ్య ఘర్షణ జరుగుతూనే ఉంది.

ఇలాంటి సమయంలో ప్రస్తుతానికి పెళ్లి ఆలోచనలేదు, నటనపైనే పూర్తిగా దృష్టి సారిస్తున్నట్టు ప్రకటించిన అనన్య ఇటీవల అనూహ్యం గా పెట్టెబేడా సర్దుకుని ఇంటి నుంచి ఉడాయించి ప్రియుడి వద్దకు చేరుకుందట. ప్రస్తుతం అంగీకరించిన చిత్రాల షూటింగ్‌లకు అక్కడి నుంచే వచ్చి నటిస్తుందని తెలిసింది. దీని గురించి అనన్య తల్లిదండ్రులను అడగ్గా అనన్య, ఆంజనేయులుకు వివాహ నిశ్చితార్థం జరిగిందని, తనకు కాబోయే భర్త వద్దకు వెళ్లడంలో తప్పేముందని సర్ది చెబుతున్నారు. వీరిద్దరికి త్వరలోనే వివాహం జరపనున్నట్టు కూడా వారు అంటున్నారు. అనన్య పెళ్లికి శుభం కార్డు పడినట్టేనా? వేచి చూద్దాం.