Posted: 05/17/2012 10:35 AM IST

      నారి నారి నడుమ మురారి అనేది ఒకప్పటి నానుడి. ఇప్పుడు నారి నారి నడుమ కెమెరా వంతు వచ్చింది.  రాజ్యసభలో ఇరువురి భామల మధ్య ఓ కెమెరా కలకలం సృష్టించింది. ఇంతకీ ఎవరా మురారి..? ఏమిటా కెమెరా అనుకుంటున్నారా ..?  అయితే ఇది చదవాల్సిందే..    జయాబచ్చన్.. అందాల భామ రేఖ.. మధ్యలో అమితాబ్.. ఈ కాంబినేషన్ బాలీవుడ్ లోనే హాట్ టాపిక్.. అమితాబ్, రేఖ బాలీవుడ్ లో హిట్ పెయిర్ గా పేరు పొందారు. వెండితెరపైనే కాదు నిజజీవితంలోనూ వీరి మధ్య కెమిస్ట్రీ బాగా వర్కవుట్ అయింది. ఇద్దరి మధ్య ప్రేమాయణం బాలీవుడ్ లోనే ఓ సంచలనం. వారిద్దరూ కొన్నాళ్లు కలసి కాపురం కూడా చేశారు. అప్పటికే అమితాబ్ కి పెళ్లయిపోవడంతో ఆయన భార్య జయాబచ్చన్ వారిద్దరినీ విడదీయడానికి నానాపాట్లు పడ్డారు. ఎలాగైతేనేం అమితాబ్ , రేఖకి దూరమయ్యారు.
      తాజాగా  సీన్ బాలీవుడ్ నుంచి రాజ్యసభకి షిఫ్ట్ అయింది. రేఖ రాజ్యసభకి నామినేట్ కావడంతో సవతుల మధ్య పోరు రోజుకో రంగు మారుతోంది. రేఖకి కేటాయించిన సీటుపై జయాబచ్చన్ తీవ్ర అసంతృప్తి వ్యక్తం చేశారు. తన సీటు వెనకాలే రేఖ సీటు ఉండడంతో మార్చమని పట్టుపట్టారు. తన పంతం నెగ్గించుకున్నారు. రాజ్యసభ సభ్యురాలిగా రేఖ ప్రమాణం చేయడంపై కూడా జయాబచ్చన్ చిటపటలాడుతున్నారు. అంతేకాదు.. రాజ్యసభ సభ్యురాలిగా రేఖ ప్రమాణం చేస్తూ ఉంటే జయాబచ్చన్ ఆమెని ఆసక్తిగా గమనించడాన్ని రాజ్యసభ టీవీ పదే పదే చూపించింది. దీనిపై జయ అగ్గిమీద గుగ్గిలమే అయ్యారు. రేఖ ప్రమాణం చేస్తుంటే తనని పదే పదే చూపించాల్సిన అవసరమేంటని ఆమె నిలదీస్తున్నారు. దీనిపై రాజ్యసభ చైర్మన్ కి ఆమె ఫిర్యాదు చేశారు. దీంతో ఆ ఫుటేజ్ ఎందుకలా వచ్చిందన్న దానిపై దర్యాప్తునకు ఆదేశించారు. రాజ్యసభ టెక్నీషియన్లను అడిగి అసలు విషయం తెలుసుకునే ప్రయత్నం చేస్తున్నారు. ఇదీ నారీ నారీ మధ్య కెమెరా స్రుష్టించిన కలకల కథనం.

...avnk