Posted: 06/20/2012 12:19 PM IST

కాంగ్రెస్ లో విలీనమైన  ప్రరాపా  వర్గంతో  కింది  స్థాయిలో  సరైన రీతిలో  సమన్వయం  చేసుకోకపోవటం ఉప ఎన్నికల్లో  ఓటమికి ప్రధాన కారణమని  మాజీ ప్రరాపా  నాయకులు  అంటున్నారు.  సమన్వయమున్న  రామచంద్రపురం, నరసాపురంల్లో విజయం సాధ్యమైందని  మిగిలిన చోట్లా  అలాగే  ఉంటే  మరికొన్ని చోట్లా  గెలుపు సాధ్యమయ్యేదని  అభిప్రాయపడుతున్నారు. కొత్త ఎమ్మెల్యేలు  కొత్త పల్లి  సుబ్బరాయుడు, తోట త్రిమూర్తులు  రాజ్య సభ సభ్యుడు  చిరంజీవిని కలిసి వివరించినట్లు తెలుస్తుంది.

ప్రరాపా యంత్రాంగాన్ని  కాంగ్రెస్  నాయకులు సరైన రీతిలో   సమన్వయం  చేసుకుని  పోవటంలేదని   వారు అంటున్నారు.  చిరంజీవి కాంగ్రెస్ లోకి  రావడంతో  వివిధ వర్గాలు, అభిమానులు,  అన్నింటికీ మించి బలమైన  సామాజిక వర్గం  అండదండలు లభించినా దానిని స్వదినియోగం   చేసుకోవటంలో  కాంగ్రెస్ నేతలు విషలమయ్యారని   ఆ పార్టీ నాయకులు అంటున్నారు.  రాయలసీమ లో ఒక వర్గం వైకాపా తో  నడిచే పరిస్థితి  ఉన్నప్పుడు  చిరంజీవి  రాకతో లభించిన  మరో వర్గం అండదండల్ని సంపూర్ణంగా  ఉపయోగించుకునేలా  కాంగ్రెస్ వ్యవహరించలేకపోయిందని  ప్రరాపా నాయకులు అంటున్నారు.  రాజం పేట  అనంతపురం , రాయచోటిల్లో  అభ్యర్థుల ఎంపికే  దీనికి  ఉదాహరణ అని  వారు అంటున్నారు.  రాయలసీమలో  ఏడు జనరల్  స్థానాలకు  ఉప ఎన్నికలు జరిగితే  తెదేపా నాలుగింటిలో  ఆ వర్గానికి  అవకాశమిచ్చిందని   గుర్తు చేస్తూ..  ఆ వర్గం ఓట్లు  కొంత మేర  తెదేపాకి  పోల్ కావటంతో  కాంగ్రెస్ పరిస్థితి  రెంటికీ చెడ్డ రేవడిలా  మారిందని  తెలిపారు.  అందుకే ధరావతు  కోల్పోయిన స్థితి ఏర్పడిందన్న భావన నెలకొందని వారు అంటున్నారు. కొంత మంది నాయకులు ప్రరాపా విలీనమైన  ఫలితం లేకపోయిందన్న వ్యాఖ్యలు వినిపించటంతో..  ఆ పార్టీ నాయకులు వివరణ ఇవ్వటం జరిగింది.  ప్రరాపా , కాంగ్రెస్  శ్రేణుల మధ్య  చక్కటి  సమన్వయం   ఉండటం వలన  సుబ్బరాయుడు,  తోట త్రిమూర్తులు  విజయం సాధించిన విషయం గుర్తు చేశారు.