Posted: 03/06/2013 06:37 PM IST

సినిమాల్లో నిలదొక్కుకున్న తారలు తమ చెల్లెళ్ళకు అవకాశం ఇప్పించటం సర్వసాధారణంగా జరిగేదే.  పంజాబీ సుందరి తాప్సీ దక్షిణాదిన సినిమాల్లోకి అడుగుపెట్టటం హైద్రాబాద్ నుంచే జరిగింది.  తెలుగు, తమిళ సినిమాల్లో పట్టు సంపాదించుకున్న తాప్సీ తన చెల్లి షగున్ ని కూడా సినిమారంగంలోకి ప్రవేశపెట్టే ఆలోచనలో ఉన్నట్టుగా తెలుస్తోంది.  

అయితే సినిమారంగంలో అక్కచెల్లెళ్లకి సమానమైన అవకాశాలు ఎప్పుడూ రాలేదు.  కాజల్ తన చెల్లెలిని నిషా అగర్వాల్ ని పరిచయం చేసింది.  అంతంత మాత్రంగానే అవకాశం దొరికింది.  నగ్మా చెల్లెలు జ్యోతిక తమిళంలో పాతుకుపోయింది, నగ్మా వెనక్కి వెళ్ళిపోయింది.  ఇంకా వెనక్కి పోతే హిందీలో పద్మిని, రాగిణిలలో పద్మిని మాత్రమే రాణించింది.  జ్యోతిలక్ష్మి, జయమాలిని విషయంలో మాత్రం ఇద్దరూ సమానంగా అవకాశాలు పొందారు అందుకు కారణం ఒకరు రిటైర్ అయిన తర్వాత మరొకరు వచ్చారు.  ఈ సూత్రానికి మరో మినహాయింపు కూడా ఉంది.  షావుకారు జానకి, ఆమె చెల్లెలు కృష్ణకుమారి.  వీళ్లిద్దరూ సినిమా అవకాశాలను దాదాపూ సమానంగా పొందారు కానీ అందులో కృష్ణకుమారి నాయిక పాత్రలను ఎక్కువగా గ్రహించింది.  భాను ప్రియ చెల్లెలు శాంతి ప్రియను దాసరి నారాయణరావు పరిచయం చేసారు కానీ చెల్లెలు మళ్లీ పత్తా లేకుండా పోయింది.  ఆర్తీ అగర్వాల్ చెల్లి అదితి అగర్వాల్ కూడా వచ్చింది కానీ ఇద్దరికీ ఎక్కువ అవకాశం లేదు.  

ప్రస్తుతం తాప్సీ తెలుగులో చేస్తున్న సినిమాలు షాడో, జాక్ పాట్ సినిమాలు, తమిళంలో మన్నిథేన్ చిత్రం, ఇంకా విష్ణువర్ధన్ నిర్మాణంలో ఉన్న పేరు నిర్ధారణ కాని చిత్రముంది. ఎప్పుడూ రెడీ నవ్వుతో దర్శకుడు, తోటి నటులకు పూర్తి సహకారంతో పనిచేస్తున్న తాప్సీ అవకాశాలను బాగానే అందుకుంటోంది. ఇంకా మిగిలినవాటిని ఎవరికో వదిలిపెట్టకుండా తన తోడబుట్టిన చెల్లికే అందితే మంచిదనే ఆలోచనైతే సరైనదే కానీ....

ఏది ఏమైనా అక్కా చెల్లెళ్ళల్లో ఒకరికే ఎక్కువ అవకాశం లభించటమనేది సాధారణంగా జరిగేది కాబట్టి తాప్సీ చెల్లెల్ని దించేముందు తన సామాన్లను, సీటుని పదిలపరచుకోవటం మంచిది.

-శ్రీజ