ఫలిస్తున్న హైకమాండ్‌ వ్యూహం...?

Posted: 10/07/2013 07:58 PM IST

తెలంగాణ విషయంలో సరైన సమయంలో సరైన నిర్ణయం అని చెప్పుకొంటూ వచ్చిన కాంగ్రెస్‌ హైకమాండ్‌ ఎన్నికల చివరి సంవత్సరంలో ఆ దిశగా నిర్ణయం తీసుకొని వ్యూహాత్మకంగా వ్యవహరిస్తోందని సమాచారం. సీమాంధ్రలోని పార్టీ నేతలు చేజారిపోకుండా చర్యలు ప్రారంభించింది. ఓరకంగా విభజన విషయంలో సీమాంధ్రకు చెందిన కొందరు కీలక ఎంపీలను ముందుగానే ఒప్పించి ఆపై వారికి కేంద్ర మంత్రి పదవులు ఇచ్చారన్న విమర్శలు కూడా ఉన్నాయి. అందుకు బలం చేకూర్చుతూ ఇప్పటికే ముగ్గురు సీమాంధ్ర కేంద్ర మంత్రులు విభజ నకు సమర్థిస్తున్నారు. పదవులకు రాజీనామాలు చేయాల ని పలుమార్లు, పలుచోట్ల కేంద్ర మంత్రి పనబాక లక్ష్మిని డిమాండ్‌ చేయగా ఆమె మాత్రం విభజనకు అంగీకరిస్తున్నట్లుగానే వ్యాఖ్యలు చేశారు. తాను రాజీనామా చేయడం ద్వారా విభజన ఆగుతుందా అని ఆమె ఉద్యమకారు లను ఎదురు ప్రశ్నిస్తున్నారు.

 

సమైక్య ఉద్యమం ఇక వృధా అన్నట్లుగానే ఆమె వ్యాఖ్యల సారాంశంగా కనిపిస్తోంది. మరో కేంద్రమంత్రి జె.డి.శీలం కూడా విభజన విష యంలో పార్టీ హైకమాండ్‌ నిర్ణయానికే కట్టుబడి ఉంటానని స్పష్టంచేశారు. కేంద్ర మంత్రి కోట్ల సూర్యప్రకాశ్‌రెడ్డి తన మంత్రి పదవికి రాజీనామా చేసినా పార్టీనీ, ఎంపీ పదవిని వీడనని పేర్కొన్నారు.కేవలం సీమాంధ్ర ప్రజల సమైక్య ఉద్యమ సెగకు తలొగ్గి ఆయన కేంద్ర మంత్రి పదవికి రాజీనామా చేశారుగానీ పార్టీని, ఎంపీ పదవిని వీడటం లేదని చెప్పడం ద్వారా పరోక్షంగా పార్టీ హైకమాండ్‌కు అండగా నిలిచారని, ఇది విభజనకు అంగీకరించడమేనని సీమాంధ్ర పార్టీ వర్గాలు పేర్కొంటున్నాయి.